МДҲга аъзо давлатлар армиялари ўртасида ўтказиладиган қўл жанги чемпионатининг қуръа ташлаш маросими бўлиб ўтди

Бугун, 10 сентябрь куни Қуролли Кучлари академиясида 10—13 сентябрь кунлари Мустақил давлатлар ҳамдўстлигига аъзо мамлакатлар дўстона армиялари ўртасида бўлиб ўтадиган армия қўл жанги чемпионатига бағишланган матбуот анжумани бўлиб ўтди. Таъкидлаш керак, бу турдаги чемпионат Ўзбекистонда биринчи маротаба ўтказилмоқда. Бу ҳақда Мудофаа вазирлиги матбуот хизмати хабар берди.

Анжуманда Ўзбекистон Мудофаа вазирлиги ташкилий қўмитаси, мусобақада иштирок этувчи жамоа вакиллари ҳамда хорижлик журналистлар қатнашди. Анжуман доирасида эртага бошланадиган мусобақанинг ўтказилиш тартиби, кимлар иштирок этиши ва ташкилий ишлар ҳақида батафсил маълумотлар берилди. Тошкентдаги «Универсал» спорт мажмуасида бўлиб ўтадиган мусобақада ҳарбий спортчилар 7 та вазн тоифасида (60 килограммдан 90 килограммгача) ўзаро беллашадилар.

Мазкур беллашув учун иштирокчиларни саралаш мақсадида жорий йил январь ойидан бошлаб Ўзбекистон Мудофаа вазирлиги қўшинларида чемпионатлар ўтказиб келинди. 7 нафар ўзбекистонлик ҳарбий спортчи мусобақанинг якуний босқичида мамлакатимиз шарафини ҳимоя қилади.

«Ўзбекистонга биринчи бор келишимиз. Беларусь Республикаси вакили сифатида шуни таъкидлашим мумкинки, меҳмондўст ҳарбийларингиз бизда жуда яхши таассурот қолдирди. Бир-биримиз билан тажриба алмашмоқдамиз, спорт бизларни ўзаро дўстлаштирмоқда. Эртага бошланадиган мусобақа ҳам юқори савияда ташкил этилганлигига шубҳаланмайман. Энг кучли спортчилар ғолиб бўлишини истаймиз», — дейди полковник Анатолий Ханаевский.

Анжуман якунлангач, ҳакамлар ҳайъати ва иштирокчи мамлакатлар вакиллари билан биргаликда қуръа ташлаш маросими бўлиб ўтди.

2017 йилда Ўзбекистон Мудофаа вазирлиги ҳарбий хизматчилари МДҲ мамлакатларининг халқаро мусобақаларида кузатувчи сифатида иштирок этган бўлса, 2018 йилнинг апрелидан Мустақил давлатлар ҳамдўстлигига аъзо давлатлар дўстона армиялари ўртасидаги ҳарбий-амалий спортнинг 7 та тури бўйича мусобақаларда иштирок этмоқда.

Тошкентда ўтказилаётган мусобақада Россия, Беларусь, Қозоғистон, Қирғизистон, Тожикистон ва Ўзбекистондан келган қўл жанги усталари ўзаро беллашади.

Эслатиб ўтамиз, апрель ойида Россияда «Командирлик стартлари стартлари» ва июнь ойида Беларусь Республикасида «Кўп кураш ҳарбий спорт комплекси» мусобақаларида Ўзбекистон ҳарбийлари иккинчи ўринни қўлга киритишган эди.