Вашингтон университети олимлари Аляскада тўлқинлари баландлиги икки юз метрга етган гигант цунами изларини топди. Уларнинг тадқиқоти Scientific Reports журналида чоп этилди, деб хабар беради «РИА Новости».
Қайд этилишича, цунами 2015 йилнинг 17 октябрида Аляска қирғоқларига ёпирилган эди. Ушбу ҳудудда аҳоли яшамайди, шунинг учун табиий офат оқибатида қурбонлар кузатилмаган ҳамда деярли сезиларсиз қолган.
Цунамини Тиндалл музлигининг эриши туфайли содир бўлган кўчки юзага келтирган. Бундай цунамилар эндиликда тез-тез юз бериши мумкин. Сабаби бутун дунё бўйлаб музликлар эримоқда. Аляскадаги музлик бунинг яққол исботидир, дейди тадқиқот муаллифлари.
Улар бундай цунамилар бугунги кунда Гренландия, Норвегия ва Патагония каби мамлакатларга хавф солмоқда, деб ҳисобламоқда.
Цунами изларини аниқлашга Аляска соҳилларидаги дарахт қолдиқлари, тошлар ва тупроқни ўрганиш орқали эришилди.
Қайд этилишича, кўчки массаси 180 миллион тоннани ташкил этган, бу цунами эса кўлами жиҳатидан сўнгги юз йилликда кузатилган цунамилар рўйхатида тўртинчи ўринни эгаллайди.
Изоҳ (0)