Президент ҳузуридаги Фуқаролик жамиятини ривожлантириш бўйича маслаҳат кенгашининг илк йиғилиши бўлиб ўтди. Бу ҳақда ЎзА хабар берди.
Унда мазкур маслаҳат кенгаши аъзолари, депутатлар, давлат ва нодавлат ташкилотлар раҳбарлари, ОАВ вакиллари иштирок этди.
Бугунги кунда фаолият кўрсатаётган 9 минг 400 дан зиёд ННТ жисмоний ва юридик шахсларнинг ҳуқуқлари, қонуний манфаатларини, демократик қадриятларни ҳимоя қилишда, ижтимоий, маданий ва маърифий мақсадларга эришишда ўз ўрнига эга.
Ўз навбатида, фуқароларнинг сиёсий маданияти ва ҳуқуқий онгини оширишда, уларнинг маънавий ва бошқа номоддий эҳтиёжларини қондиришда нодавлат нотижорат ташкилотларининг фаол иштирок этишига тўсқинлик қилаётган қатор муаммо, камчиликлар мавжуд.
Маслаҳат кенгаши йиғилишида давлат раҳбарининг 2018 йил 4 майдаги «Мамлакатни демократик янгилаш жараёнида фуқаролик жамияти институтларининг ролини тубдан ошириш чора-тадбирлари тўғрисида»ги фармонида белгиланган вазифалар ижроси юзасидан амалга оширилиши лозим бўлган масалаларга эътибор қаратилди. Ижтимоий-иқтисодий ривожланиш дастурлари, норматив-ҳуқуқий ҳужжатлар ишлаб чиқиш ва амалга оширишга нодавлат нотижорат ташкилотларини жалб қилиш даражасининг пастлиги таъкидланди.
Тадбирда мамлакатни иқтисодий, ижтимоий-сиёсий жиҳатдан янада ривожлантириш бўйича инновацион ғояларини таклиф қиладиган фаол нодавлат нотижорат ташкилотларини қўллаб-қувватлаш ва рағбатлантиришда сусткашликка йўл қўйилаётгани айтилди.
Нодавлат нотижорат ташкилотларининг моддий-техника таъминоти қониқарсиз ҳолатда. Турли сунъий тўсиқ ва ғовлар ўрта, узоқ муддатли, кенг кўламли лойиҳалар ва дастурларни амалга оширишга имкон бермаяпти.
Бу каби муаммолар таҳлил этилган йиғилишда фуқаролик жамиятини ривожлантиришнинг миллий модели, шу асосда ўрта ва узоқ муддатли истиқболга мўлжалланган стратегик йўналишлар бўйича ҳолатни яхшилаш юзасидан таклифлар берилди. Фуқаролик жамиятини ривожлантириш соҳасида фундаментал ва амалий тадқиқотларни ташкил этишга оид тавсиялар ишлаб чиқилди.
Изоҳ (0)