А Серия. Роналдунинг дебют ўйинида «Ювентус»дан иродали ғалаба, Анчелотти «Наполи» билан 1-ўйинида ютуққа эришди (видео)

Кеча, 18 август санасида Италия А Сериясининг биринчи тур баҳслари бошланди. Тур доирасида икки учрашув бўлиб ўтди.

Жумладан, Туриннинг «Ювентус» жамаоси «Кьево» меҳмони бўлди.

Учрашувда ҳисоб 3-дақиқада Сами Хедира томонидан очилди. Шундан сўнг мезбонлар сафида Мариуш Стемпински (38-дақиқа) ҳамда Эммануэль Жаккерини (56-дақиқа) гол уриб, жамаосини ҳисобда олдинга ўтиб олишини таъминлади. 75-дақиқада Бани ўз дарвозасини ишғол этиб, «Юве»га ёрдам бериб қўйган бўлса, Федерико Бернардескининг 90-дақиқда киритган голи туринликларга ўта қийин ғалабани тақдим этди. Ўйинда «Реал»дан «Ювентус»га ўтган беш карра «Олтин тўп» соҳиби Криштиану Роналду тўлиқ 90 дақиқа ўйнади.

Карло Анчелотти қўл остидаги расмий биринчи ўйинда «Наполи» эса Римда «Лацио» меҳмони бўлиб, 1:2 ҳисобидаги ғалабани тантана қилди. «Лацио» таркибида Чиро Иммобиле тўп киритган бўлса, унга неаполликлардан Аркадиуш Милик ҳамда Лоренцо Инсинье ўз номини таблога ёздириб қўйишга эришди.

Бугун 1-тур учрашувлари давом эттирилади.