Жиноят ишлари бўйича Когон шаҳар суди томонидан 2 август куни Бухоро вилоят ИИБ Жазони ижро этиш бўлими УЯ 64/85-сонли жазони ижро этиш муассасасида сайёр суд мажлиси бўлиб ўтди. Бу ҳақда шаҳар суди судьяси Зариф Шеров «Дарё»га маълум қилди.
Сайёр суд мажлисида 18 нафар маҳкумга нисбатан жазони ижро этиш муассасаси томонидан киритилган тақдимномалар кўриб чиқилиб, Жиноят кодексининг 74-моддасига асосан муассасада жазо тури учун ўрнатилган тартиб-қоида талабларини бажарган ва меҳнатга ҳалол муносабатда бўлган маҳкумларнинг ўталмай қолган озодликдан маҳрум қилиш жазо муддатлари ахлоқ тузатиш ишлари жазосига алмаштириш бўйича ажримлар эълон қилинган.
Суд раиси Зариф Шеров маҳкумларга уларнинг ҳуқуқ ва мажбуриятлари, алмаштирилган енгилроқ жазони ўташ даврида бошқа жиноят содир этилган тақдирда жазонинг ўталмаган қисми янги жазога қўшилган ҳолда тайинланиши мумкинлиги, шу сабабли ахлоқ тузатиш ишлари жазосини ўташ тартиб-қоидаларига қатъий риоя қилиб, муносиб хулқ-атворда бўлиш лозимлиги ҳақида тушунтириш берган.
Сайёр суд мажлиси давомида маҳкумлар ҳам қилмишларидан пушаймонликлари, яқинлари бағрига қайтишга имкон берган қонуннинг инсонпарварлик тамойили учун миннатдор эканликларини таъкидлаган. «Улар келгусида жиноят содир этмай, ҳалол меҳнат ва соғлом турмуш тарзини танлашга ваъда берди», — деб ёзади Зариф Шеров.
Изоҳ (0)