2018 йили 2000 нафар халқ таълими ходими масофавий малака ошириш курсларида ўқитилади
2018 йили 2000 нафар халқ таълими муассасалари раҳбар ва мутахассислари масофавий малака ошириш курсларида ўқитилади. Бу ҳақда Масофадан ўқитишни ривожлантириш маркази мудири Асқар Ибраймов «Дарё»га маълум қилди.
2018 йилнинг биринчи яримида 1454 нафар мутахассис малака ошириш курсларига жалб этилган. 2018 йилдан бошлаб мактаб ўқитувчиларининг малакасини ошириш Олий ва ўрта махсус таълими вазирлиги тизимига ўтказилган.
Халқ таълими тизимида масофадан малака ошириш 2009 йилдан бошланган. Жумладан, 2009 йили бир қатор мутахассислар Германияда масофадан ўқитиш бўйича тажриба орттирган. Мутахассислар томонидан умумий ўрта таълим мактабларининг 11 та фан (кейинчалик 14 тага етказилди) ўқитувчиси учун масофавий курслар ишлаб чиқилди. Илк бор ўзбек тилига таржима қилинган MOODLE платформасига барча масофавий курсларнинг методик таъминоти жойлаштирилди.
Масофавий курслар 2010 йилдан бошлаб республика миқёсида жорий қилинган. 2013 йилдан халқ таълими муассасалари раҳбар ва мутахассис ходимлари учун масофавий курслар ташкил қилинган.
Ҳозирги кунга қадар 35 999 нафар умумий ўрта таълим мактаблари ўқитувчилари, 2 583 нафар халқ таълими муассасалари раҳбар ва мутахассислари — жами 38 585 нафар халқ таълими ходими масофадан малака ошириш курсларига жалб этилди.
