Навоийда ҳокимнинг биринчи ўринбосари 4 минг доллар ва 16 млн сўм пора билан қўлга тушди
ДХХ Навоий вилояти бошқармаси Бош прокуратура ҳузуридаги департаментнинг вилоят бошқармаси билан ўтказган тезкор тадбири давомида Навбаҳор туман ҳокимининг биринчи ўринбосари Ойбек Хаиров маҳаллий тадбиркордан 4000 минг АҚШ доллари ва 16 миллион сўмни пора сифатида олаётган вақтида ушланди. Бу ҳақда "Ёшлар" телеканалида махсус кўрсатув намойиш этилди, дея хабар беради UZ24.
Маълум бўлишича, Ойбек Хаиров пулларни Конимех туманидаги балиқчиликка ихтисослашган масъулияти чекланган жамиятга Навбаҳор туманидаги коллекторда мақсадсиз оқиб ётган сувни 6 километрдан ортиқроқ масофада ариқ қазиб олиб келиш учун туман ҳокимининг тегишли қарорини чиқартириб бериш эвазига олган.
Дастлабки тергов олди суриштирув жараёнларида мансабдор туман ҳокимининг ушбу қарорини чиқартириб бериш учун тадбиркордан аввал 3500 минг АҚШ доллари ва 4 миллион сўм олганлиги аниқланди.
Ҳозирда Ойбек Хайировга нисбатан Жиноят кодексининг 210-моддасига асосан қўзғатилган жиноят иши доирасида вилоят прокуратураси томонидан тергов ҳаракатлари олиб борилмоқда.
