Футбол бўйича Ўзбекистон терма жамоасини аргентиналик Эктор Купер бошқариб боради, деб ёзмоқда «Халқ сўзи Online».
Таъкидланишича, Ўзбекистон футбол ассоциацияси аргентиналик мутахассис билан келишувга эришган. Яқин соатлар ичида мазкур битим борасида расмий хабар берилиши кутилмоқда.
Ўзбекистон футбол ассоциацияси, бунгача португалиялик Карлуш Кейруш ва хорватиялик Златко Далич номзодлари билан ҳам музокаралар олиб борган. Бироқ улар билан келишувга эриша олмаган. Эктор Купер ва ЎФАнинг ўзаро манфаатлари бир-бирига мос келгани айтилмоқда.
Маълумот учун Эктор Купернинг сўнгги жамоаси Миср терма жамоаси эди. У жамоани 32 йил ичида илк марта Жаҳон Чемпионатига олиб чиқди. 62 ёшли мутахассис мисрликлар билан ЖЧ—2018 даги муваффақиятсиз иштирокдан сўнг истеъфога чиқарилди.
Бунга қадар аргентиналик мураббий Аргентинанинг «Уракан», «Ланус», Испаниянинг «Мальорка», «Валенсия», «Реал Бетис», «Расинг», Италиянинг «Интер», «Парма», Туркиянинг «Ўрдуспор», Грециянинг «Арис», БААнинг «ал-Васл» клубларида, Грузия (2008-2009) терма жамоасида ҳам фаолият олиб борган.
Изоҳ (0)