Жиноят ишлари бўйича Самарқанд туман суди судьяси Д.Нуралиев раислигида бўлиб ўтган судда «Захлик» МФЙ котиби М.Намозовнинг жиноий ҳаракатлари кўриб чиқилди, деб хабар беради «Дарё» мухбири Фарҳод Норбўтаев.
Самарқанд туман «Захлик» МФЙ котиби М.Намозов шу маҳаллада яшовчи фуқаро Д.Кулбаевага бола парвариши учун маҳалла фуқаролар йиғини махсус комиссиясининг 2018 йил 27 февралдаги оиланинг моддий ва мулкий ҳолатини ўрганиш далолатномасига асосан унга бола парвариши учун 2018 йилнинг 3-8-ойларида моддий ёрдам тайинланганлигини билган ҳолда, ушбу тайинланган нафақа пулининг бир ойлиги яъни, 137 минг сўм пулларини Д.Кулбаевадан тамагирлик йўли билан талаб қилиб келган.
Жорий йилнинг 16 апрель куни маҳалла котиби М.Намозов Д.Кулбаевадан талаб қилган пулларнинг 50 минг сўмни олган. Орадан бир оз вақт ўтганидан сўнг, маҳалла котиби қолган 87 минг сўм пул маблағларини беришни талаб қилиб келган.
Икки нафар фарзанднинг онаси, жабрланувчи Д.Кулбаева турмуш ўртоғининг велосипеддан йиқилиб, тос суякларини синдириб олганлиги боис оиласида ишлайдиган боқувчи йўқлиги учун пулни тўлашга имкони бўлмаган. Шу сабабли ҳуқуқни муҳофаза қилувчи ташкилот вакилларига мурожаат қилган.
2018 йил 18 апрель куни ҳуқуқни муҳофаза қилувчи органлар ҳамкорлигида ўтказилган тезкор тадбирда, Самарқанд туман «Захлик» маҳалла фуқаролар йиғини маъмурий биносида, фуқаро Д.Кулбаевадан бола парвариши нафақаси чиқарилганлиги юзасидан қолган 87 минг сўм пул маблағларини М.Намозов таъмагирлик йўли билан олаётган вақтда, тезкор гуруҳ томонидан ушланган.
Суд давомида гувоҳлар ва жабрланувчиларнинг фикрлари тўлиқ тингланиб, воқеа тафсилотлари атрофлича ўрганилиб суднинг ҳукми эълон қилинди.
Суд ҳукмига кўра, Маъмур Намозов Ўзбекистон Республикаси Жиноят Кодексининг 214-моддаси 2-қисми «б» банди билан, 45-моддасини қўллаб, 2 йил маҳалла фуқаролари йиғинида ишлаш ҳуқуқидан маҳрум қилиниб, 2 йил озодликни чеклаш жазоси тайинланди. Ўзбекистон Республикаси Жиноят Кодексининг 61-моддаси тартибида тайинланган жазолар алоҳида-алоҳида ижро этилиши белгиланди.
Изоҳ (0)