Пойтахтдаги Hyatt Regency Tashkent меҳмонхонасида ташкил этилган ахборот хавфсизлиги ва кибержиноятчиликка қарши кураш масалаларига бағишланган амалий семинарда Ўзбекистондаги 70 дан ортиқ корхона ва ташкилотлар вакиллари иштирок этди. Бу ҳақда ЎзА хабар бермоқда.
Тадбир мамлакатдаги «Ниҳол» компаниялар гуруҳи, аппарат ва дастурий таъминот ишлаб чиқариш, етказиб бериш, ахборот технологиялари ҳамда консалтинг хизматлари кўрсатиш бўйича дунёдаги йирик компаниялардан бири бўлган АҚШнинг IBM компанияси ҳамда «МУК» компаниялар гуруҳи ҳамкорлигида ташкил этилди.
Семинардан кўзланган асосий мақсад Ўзбекистон корхоналари ва давлат ташкилотлари киберхавфсизлигини таъминловчи маҳаллий IT-мутахассислар ўртасида кибертаҳдидларга қарши кураш ва дастурий таъминотнинг зарарли турлари пайдо бўлишига оид энг янги тенденциялар тўғрисида ахборот тарқатишдан иборатдир.
Амалий семинарнинг очилишида сўзга чиққан IBM компаниясининг мамлакатдаги ваколатхонаси раҳбари Ўктам Эргашев ва «Ниҳол» компаниялар гуруҳи директор ўринбосари Елена Роман бугунги кунда ахборот тизимларини ҳимоялаш масалалари Ўзбекистон идоралари фаолиятининг устувор йўналишларидан бири эканини таъкидлади. Ахборот хавфсизлигини таъминловчи тузилмалар ишини тўғри режалаштириш ва ташкил қилиш нафақат ҳозир, балки келажакда ҳам ҳар қандай корхона муваффақиятли фаолиятининг ажралмас таркибий қисми ҳисобланади. Ўзбекистон IT-бозорида кўплаб замонавий кибертаҳдидлардан юқори даражада ҳимояланиш имкониятини берувчи ахборот хавфсизлиги соҳасидаги энг илғор технология ва ечимлар намойиш этилган.
Семинар дастури икки қисмга ажратилди. Дастлаб иштирокчилар йирик хорижий компаниялар томонидан қўлланилаётган хакерлар ҳужумларига қарши таъсир кўрсатувчи сўнгги кибертаҳдидлар ва услублар тўғрисида маълумотга эга бўлди. «Ниҳол» ва IBM компанияси мутахассислари Ўзбекистонда киберхавфсизлик таҳлили, маълумотлар базаси хавфсизлигида хавфсизлик ва тежамкорликни таъминлаш, инфратузилмани муҳофаза қиладиган когнитив технологияларга оид маърузаларини тақдим этди.
Семинар қатнашчилари олган назарий билимларни амалда синаб кўриш мақсадида киберҳужум симуляцияси ташкил этилди. Маҳаллий компания ва давлат ташкилотларининг ахборот технологиялари бўйича мутахассисларига унинг ечимини топиш, сўнгра ҳодисани таҳлил қилиб, келажакда бу каби муаммоларни бартараф этиш бўйича таклифлар киритиш вазифаси юклатилди.
Семинар доирасида ахборот хавфсизлигини таъминлаш соҳасидаги энг янги ишланмалар намойиш этилди.
Изоҳ (0)