Расман: Маурицио Сарри «Челси»га бош мураббий бўлди

Лондоннинг «Челси» клубини италиялик Маурицио Сарри бошқарадиган бўлди. Бу ҳақда лондонликлар матбуот хизмати хабар берди.

Сарри «Челси» билан 3 йиллик шартнома имзолади. Унинг йиллик маоши 6 миллион евро этиб белгиланди. 59 ёшли мутахассисга ёрдамчи сифатида «кўклар»нинг собиқ ҳужумчиси Жанфранко Зола тайинланган.

Зола 1996—2003 йиллар оралиғида «Челси» сафида тўп сурган. У мухлислар томонидан клуб тарихидаги энг яхши ўйинчи сифатида эътироф этилган.

Маурицио Сарри эса мураббийлик фаолиятини 1990 йилда бошлаган. 2015 йилдан 2018 йилгача эса «Наполи»га бош мураббийлик қилди.

У бу орада А Серияда икки марта 2-ўринни, бир марта эса 3-ўринни қўлга киритган.

2015/2016 йилги мавсум якунига кўра Италиянинг энг яхши мураббийи сифатида эътироф этилган.

«Янги ишим бошланишини интизорлик билан кутяпман»,—дейди «Челси»нинг янги бош мураббийи.