Осиё ўйинларига 50 кун қолди. Индонезияда ўтадиган мусобақа ҳақида нималарни биламиз?

Жорий йилнинг 18 августидан 20 сентябрига қадар Индонезиянинг Жакарта ва Палембанг шаҳарларида XVIII Осиё ўйинлари бўлиб ўтади.

Мусобақа старт олишига роппа роса 50 кун қолганида Ўзбекистон Миллий олимпия қўмитаси қитъанинг ушбу нуфузли мусобақага оид қизиқарли фактларни тақдим этди.

Ўйинлар пойтахт Жакарта ва у ердан 1000 километр узоқликда жойлашган Палембанг шаҳарларида бўлиб ўтади. Тантанали очилиш маросими Жакартадаги «Гелора Бунг Карно» стадионида ўтказилади. Индонезиядаги Осиё ўйинларининг ташкилий қўмитаси (INASGOC) раҳбари Эрик Тоҳир мусобақа давомида спортчиларга барча шароитлар яратиб берилишини маълум қилган.

«Биз нафақат Индонезия аҳолисини, балки бутун Осиёни қамраб олмоқчимиз. Улар учун қулай шароитлар яратиш, чипталар олиш борасида енгилликлар бериш ҳам шулар жумласидандир. Спортчилар ушбу мусобақанинг энг асосий меҳмонларидир. Улардаги шароит — транспорт, хавфсизлик, овқатланиш энг яхши бўлиши лозим. Ташкилий қўмита ўз олдига биринчи навбатда ушбу вазифаларни бажаришни мақсад қилиб қўйган», — деди Эрик Тохир.

Маълум бўлишича, ташкилий қўмита чипта сотиш бўйича KiosTix халқаро агентлик билан ҳамкорлик қилмоқда. Ўйинлар учун 1,3 миллион чипта сотилиши режалаштирилган. Энг арзон чипта нархи 30 000 рупий (2 АҚШ доллари), ўртачаси 100 000 рупий (7 АҚШ доллари) этиб белгиланган. Ушбу нарх орқали ташкилотчилар иложи борича кўпроқ томошабинларни қамраб олмоқчи. Чипталарни супермаркет, дўкон, банкларда ва KiosTix тизими орқали онлайн тартибда харид қилиш мумкин бўлади. Чипталар сотуви 30 июнь куни бошланади.

Хавфсизлик масаласида муаммолар бўлмайди. INASGOC бу борада 2016 йилдан буён мамлакат қуролли кучлари билан ҳамкорлик қилиб келмоқда. Осиё ўйинлари давомида 36 000 нафарга яқин хавфсизлик хизмати ходимлари иш олиб боради.

Бугун, 29 июнь куни ўйинларнинг медаллар жамланмаси намойиш этилди. Жакартада спортнинг 40 туридан 67 йўналишда, 463 мусобақа ташкил қилинади. Осиё ўйинлари давомида 4 066 медаль ўз эгасини топади.

Ўзбекистон ушбу спорт байрамида катта делегация билан иштирок этишни режалаштирмоқда. Мамлакат мусобақада ўзининг энг кучли спортчилари билан қатнашади.

Бугунги кун ҳолатига кўра, Ўзбекистон спорт делегацияси Осиё ўйинлари дастуридан ўрин олган 29 спорт турида иштирок этишни режалаштирилмоқда. Беллашувларда 260 дан ортиқ спортчи Ўзбекистон шарафини ҳимоя қилади. Шунингдек, 100 дан ортиқ расмий вакиллар (мураббий, шифокор, менежер, ОАВ ходимлари) ҳам мусобақада фаолият олиб боради.