АҚШнинг Harley-Davidson компанияси Европага сотиладиган мотоциклларни ишлаб чиқарувчи заводларини янги божлар туфали мамлакатдан ташқарига кўчиради. Бу ҳақда The Wall Street Journal’га таяниб, «Vedomosti.ru» хабар берди.
АҚШнинг қимматли қоғозлар ва биржалар бўйича Комиссияси (SEC) сайтидаги эълонда Европа Иттифоқи Қўшма Штатлардан импорт қилинган мотоциклларга нисбатан божларни 6 фоиздан 31 фоизга оширгани хабар қилинган. Бу дегани, ҳар бир мотоцикл нархи 2200 долларга қимматлашади. Натижада Европа жорий қилган янги божлар туфайли Harley-Davidson 90—100 миллион доллар зарар кўради. Шунга қарамасдан, компания Европадаги бизнеси молиявий зарар кўришига қарамасдан мотоцикллар нархини оширмаслигини маълум қилган.
Европа бозори компания учун аҳамиятлилиги бўйича иккинчи ўринда туради. 2017 йили компания Европада 44 935 та мотоцикл сотган. Бу жами сотилган мотоциклларнинг 18,5 фоизи бўлиб, АҚШ ташқарисида сотилган мотоциклларнинг ярмини ташкил қилади. Ишлаб чиқаришни АҚШдан кўчириш 9 ойдан 18 ойгача вақт олади ва қўшимча сармоя талаб қилади. Мотоцикллар Европага Ҳиндистон, Бразилия ва Тайландданги заводлардан экспорт қилинади.
25 июнь, душанба куни Harley-Davidson акциялари нархи 2,7 фоизга тушиб кетган.
Бир йил илгари АҚШ президенти Дональд Трамп Оқ уйда Harley-Davidson’нинг бош менежерлари билан учрашган. Трамп компанияни «Янги америкача руҳ»нинг тимсоли деб атаган.
Ўтган ҳафтада компания Канзас-Ситида мотоциклларни йиғиш билан шуғулланадиган заводнинг ёпилиши ва 800 нафар ходимнинг ишдан бўшатилганини эълон қилди. Harley-Davidson’нинг ижроия директори Метю Леватич компаниянинг савдода муваффақиятсизликка учраётганини Трампнинг савдо-сотиқ сиёсати билан боғлаган.
22 июнь, жума куни Европа комиссияси 2,8 миллиард еврога тенг Америка импорт товарларига нисбатан қўшимча 25 фоиз бож жорий қилди. Янги божлар пўлат, алюминий, мотоцикл, жўхори, бурбон (АҚШда жўхоридан тайёрланадиган виски тури) ва жинси сингари товарларга нисбатан жорий қилинган. Июнь ойи бошида Дональд Трамп Европа Иттифоқи, Канада ва Мексика маҳсулотларига нисбатан қўшимча солиқлар жорий қилган эди: пўлатга 25 фоиз ва алюминийга 10 фоиз. Европа комиссиясининг ҳисоб-китобига кўра, янги божлар 6,4 миллиард евролик Европа экспорт товарларига нисбатан жорий қилинади.
Изоҳ (0)