Қашқадарёда 10 тоннадан зиёд рангли металлнинг мамлакатдан ноқонуний олиб кетилишига чек қўйилди

Қашқадарёда рангли металлни ноқонуний равишда мамлакатдан олиб чиқиб кетишга уриниш ҳолатлари фош этилди. Бу ҳақда Қашқадарё вилояти божхона бошқармаси ахборот хизмати «Дарё»га маълум қилди.

«Рангли металлар парчалари ва чиқиндилари экспортини тартибга солиш тўғрисида» фармонга мувофиқ рангли металл парчалари ва чиқиндиларини Ўзбекистондан ташқарига олиб чиқиб кетиш тақиқланган.

Қашқадарё вилояти божхона хизмати ходимлари ҳамда вилоят ИИБ Йўл ҳаракати хавфсизлиги бошқармаси билан ҳамкорликда қора ва рангли металлни мамлакат ташқарисига олиб чиқиб кетиш билан боғлиқ ҳолатлар фош қилинди. Хусусан, Чироқчи—Қарши йўналишида ҳаракатланаётган Isuzu русумли юк машинаси Қўнғиртоғ ЙПХ маскани яқинида тўхтатилган. Машина юкхонаси кўздан кечирилганда, ҳеч қандай ҳужжатлари бўлмаган, умумий қиймати 23 миллион 190 минг сўмлик, 10 тоннадан зиёд алюминий ва қўрғошин аниқланган. Шунингдек, Қарши—Бешкент йўлида Nexia русумли автомашинаси салони ва юкхонасидан 500 минг сўмлик 123 килограмм қўрғошин, алюминий ва мис топилган.

Ҳозирда мазкур ҳолатлар юзасидан божхона текширувлари ва суриштирув ишлари олиб борилмоқда.