Жорий йил 12—17 июнь кунлари Хитойнинг Циндао шаҳрида бўлиб ўтадиган Шанхай ҳамкорлик ташкилотига аъзо мамлакатлар кинофестивалида ўзбек фильмлари ҳам намойиш этилади. Бу ҳақда «Ўзбеккино» миллий агентлиги матбуот хизмати маълум қилди.
Фестиваль ташкилотчиларига «Йўл бўлсин» ва «Meросхўр» фильмлари инглиз тилидаги субтитр билан таъминланган ҳолда тақдим этилди. Ушбу фильмлар фестиваль ҳайъат аъзолари томонидан танлаб олиниб, фестивалнинг асосий дастурида намойишга тавсия этилган.
Шунингдек, фестиваль доирасида 14-15 июнь кунлари «ШҲТга аъзо давлатлар кинофестивали иштирокчилари кинобозори» ташкил этилиши режалаштирилган бўлиб, ушбу тадбирда Хитойнинг нуфузли кинокомпаниялари ва медиа ташкилотлари иштирокида фильмлар прокатини таъминлаш ва ҳамкорликда фильмлар ишлаб чиқариш масалалари муҳокама қилинади.
Тадбир давомида ҳар бир иштирокчи мамлакатга павильонлар ажратилиб, миллий кинематография намуналарини ШҲТга аъзо мамлакатлар ҳудудларида намойиш этиш имкониятлари ўрганилиб, тегишли шартномалар имзоланиши режалаштирилган.
Қайд этиш жоизки, «Йўл бўлсин» фильми режиссёр Қамара Камалова мазкур кинофестивалда ҳайъат аъзоси сифатида иштирок этади.
Изоҳ (0)