Вилоят касаба уюшмалари ташкилотлари бирлашмаси ташаббуси билан ички ишлар, мактабгача таълим, соғлиқни сақлаш, қишлоқ хўжалиги бошқармалари, Фермер, деҳқон хўжаликлари ва томорқа ер эгалари кенгаши ва қатор йирик саноат корхоналари ҳамкорлигида ташкил этилган танлов ёш мутахассислар касб маҳоратини оширишда муҳим омил бўлмоқда. Бу ҳақда ЎзА хабар берди.
«Энг фаол ёш ипакчилик саноат ходими», «Энг фаол ёш ички ишлар ходими», «Энг фаол ёш қурувчи», «Энг фаол ёш олим», «Энг фаол ёш тарбиячи», «Энг фаол ёш транспортчи», «Энг фаол ёш фермер», «Энг фаол ёш шифокор» номинациялари бўйича ўтказилган танловнинг қуйи босқичларида 90 дан зиёд ёш мутахассис баҳслашди.
Танловнинг вилоят босқичида 8 номинация бўйича 24 нафар иштирокчи қатнашди.
Кармана туманидаги «Камалак» 6-мактабгача таълим муассасаси тарбиячиси Чарос Маматованинг «Нилуфар гули» деб номланган янги методик тарбия усули ўзига хослиги билан ажралиб туради. Ўз ишига ноанъанавий ёндашуви сабаб, ёш мутахассис «Йилнинг энг фаол ёш тарбиячиси» номинацияси ғолиби бўлди.
Ғолиблар танловнинг мамлакат босқичида иштирок этади.
Изоҳ (0)