Тошкентда инновацион ривожланиш истиқболлари мавзусида халқаро конференция ўтказилди

28 май куни Тошкент давлат иқтисодиёт университети ҳамда Ўзбекистон Республикаси Банк-молия академияси, Тошкент шаҳридаги Халқаро Вестминстер университети ҳамкорлигида «Ўзбекистон Республикасининг Ҳаракатлар стратегияси: макроиқтисодий барқарорлик, инвестицион фаоллик ва инновацион ривожланиш истиқболлари» мавзусида халқаро илмий-амалий анжуман бўлиб ўтди. Халқаро пресс клуб ушбу тадбирда ахборот ҳамкори сифатида иштирок этди.

Конференцияни ўтказишдан асосий мақсад қилиб, Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясининг учунчи йўналиши − «Иқтисодиётни ривожлантириш ва либераллаштириш»га мувофиқ белгиланган чора-тадбирларнинг ижроси йўлида амалга оширилган кенг кўламли ислоҳотларга жаҳон ҳамжамияти, хусусан нуфузли олимлар, амалиётчи мутахассислар ва халқаро экспертлар томонидан билдирилаётган муносабат ва эътирофларга илмий-назарий, илмий-услубий ҳамда илмий-амалий жиҳатдан баҳо бериш белгиланган.

Мазкур конференцияда Россия, Марказий Осиё ва хорижий мамлакатларнинг таниқли иқтисодчи олимлари, хусусан, Россия, Қозоғистон, Қирғизистон, Тожикистон Фанлар академияларининг академиклари, Германия, Буюк Британия, Австралия, Индонезиядан ташриф буюрган олий таълим муассалари ректорлари ва иқтисодчи олимлари, халқаро ташкилотлар, дипломатик корпус ва хорижий компаниялар вакиллари ҳамда Ўзбекистон томонидан Фанлар академиясининг иқтисодиёт соҳасидаги академиклари, илмий-тадқиқот институтлари директорлари, амалиётчи мутахассислар ҳамда нуфузли олий таълим муассасаларининг ректорлари ва профессор-ўқитувчилари иштирок этди.

Конференцияда Ҳаракатлар стратегиясининг учинчи устувор йўналиши – «Иқтисодиётни ривожалантириш ва либераллаштириш» бўйича бир қатор ислоҳотлар амалга оширилгани бўйича академиклар, нуфузли иқтисодчи олимлар ва амалиётчи мутахассисларнинг маъруза тақдимотлари амалга оширилди.

29 май куни конференция секциялари давом этади. Сексиялар Тошкент давлат иқтисодиёт университети, Ўзбекистон Республикаси Банк-молия академияси, Халқаро Вестминстер университетида давом этади.