Президентнинг 21.05.2018 йилдаги ПҚ-3731-сон қарори билан Президент ҳузуридаги Давлат бошқаруви академиясига қабулнинг янги тартиби ва квоталар тасдиқланди. Бу ҳақда Norma хабар берди.
Маълумот учун: Президент ҳузуридаги Давлат бошқаруви академияси (бундан кейин – Академия) – бошқарув кадрларини тайёрлаш, қайта тайёрлаш ва малакасини ошириш, шунингдек давлат ва жамоатчилик бошқаруви соҳасида фундаментал ва илмий-амалий тадқиқотлар ўтказиш бўйича олий давлат таълим муассасаси.
Қабулнинг янги тартиби илгари амал қилганидан (ўз кучини йўқотган) анча фарқ қилади. Киритилаётган асосий янгиликлар қуйидагича:
Ким грант бўйича ўқиши мумкин, ким Академияда ўқишга тавсия этади?
Академия магистратурасида грант асосида ўқишга талабгорлар орасидан хўжалик бошқаруви органлари ходимлари чиқариб ташланди. Шу тариқа, энди Академияга фақат давлат ҳокимияти ва бошқаруви органлари, шунингдек давлат муассасалари ва давлат ташкилотлари ходимлари грант асосида қабул қилинади.
Энди бошқалар қатори, тадбиркорлик субъектлари ҳам магистратурага, қайта тайёрлаш курсларига қабул қилиш учун шахсларни тавсия эта олади. Шунингдек ушбу ҳуқуққа, эслатиб ўтамиз, давлат ҳокимияти ва бошқаруви, хўжалик бошқаруви органлари ва ННТ эгадир. Бундан ташқари, тадбиркорлар малака ошириш курсларига тингловчиларни қабул қилиш учун ариза бериши мумкин.
Қабул ва танлов асосида саралаб олиш тартиби – магистратура ва кадрларни қайта тайёрлаш учун ягона
Шу йилдан бошлаб магистратура ва қайта тайёрлаш курсларига қабул учун ҳужжатларни қабул қилиш ва танлов ўтказишнинг ягона тартиб-таомили белгиланмоқда.
Жойларда бошланғич сараловда қатнашиш учун идоравий комиссияга умумий пакетда эндиликда қуйидаги ҳужжатлар ҳам тақдим этилади:
- меҳнат дафтарчасининг тасдиқланган нусхаси;
- белгиланган намунадаги маълумотнома-объективка;
- олий маълумоти тўғрисидаги ҳужжат нусхаси;
- 3,5×4,5 ўлчамли 4 та фотосурат;
- 086-У-сон шакл бўйича тиббий маълумотнома.
Академияга қабул қилиш учун ҳужжатларни тақдим этиш муддатлари ўзгарди. Илгари улар 15 июндан 15 июлгача қабул қилинар эди, бу йил эса – 1 июндан 20 июнгача.
Танлов асосида саралов ўтказишда тестлар ҳамда вазиятга доир вазифаларни ечиш тарзида номзодга психологик ташхис қўйиш босқичи чиқариб ташланди. Шу тариқа, энди магистратура ва қайта тайёрлаш курсларига қабул 3 босқичдан (илгари – 4 та эди) ташкил топади.
Биринчи босқич – жойларда номзодларни бошланғич саралаб олиш, иккинчи – Ўзбекистон тарихи бўйича ва мантиқий фикрлаш даражасини аниқлаш учун тест синовлари, учинчи – бошқарув кўникмаларига эгалигини баҳолаш учун суҳбатдан ўтказиш.
Тест синовлари якунларига кўра энг юқори баллнинг камида 35 фоизини тўплаган номзодлар суҳбатдан ўтказилади.
Бошқарув кадрларининг малакасини ошириш даврийлиги аниқлаштирилди – 3 йилда 1 марта. Курс давомийлиги – 1 ойдан ортиқ эмас.
2018/2019 ўқув йилига қабул квоталари
Энди қабул квоталарини Академиянинг ўзи, илгари ушбу масалани ҳал қилган Президент Девонининг Ташкилий-кадрлар хизмати билан келишган ҳолда шакллантиради.
Бўлажак ўқув йилида қуйидаги йўналишларнинг ҳар бирига жами 60 кишидан (24 нафари – грант, 36 нафари – контракт асосида) қабул қилинади:
- магистратурага;
- ишлаб чиқаришдан ажралган ҳолда кадрларни қайта тайёрлаш курсларига;
- ишлаб чиқаришдан ажралмаган ҳолда кадрларни қайта тайёрлаш курсларига.
Изоҳ (0)