15—19 май кунлари Москва олий умумқўшин қўмондонлик билим юртида МДҲга аъзо давлатлар Мудофаа вазирликларининг курсантлари ўртасида «Ҳарбий-касбий тайёргарлик» бўйича IV Халқаро олимпиаданинг навбатдаги баҳслари бўлиб ўтди. Унда Ўзбекистон Мудофаа вазирлиги курсантлари биринчи марта иштирок этишига қарамай, иккинчи ўринни қўлга киритди. Бу ҳақда вазирлик матбуот хизмати хабар берди.
Чирчиқ олий танк қўмондонлик-муҳандислик билим юрти тактика кафедраси бошлиғи подполковник Ғани Тўраев ва билим юртининг отиш тайёргарлиги кафедраси катта ўқитувчиси подполковник Мирзоҳид Ҳасанов бошчилигида курсантлар МДҲга аъзо мамлакатларнинг олий ҳарбий таълим муассасаларидан иштирок этган 300 нафардан зиёд энг сара курсантлари ўртасида тактик ва тактик махсус, отиш, ҳарбий-спорт тайёргарликлари ҳамда ижтимоий миссия каби шартларида беллашди. Олимпиаданинг ушбу йўналишида тўртта шартдан ўзбекистонлик курсантлар учтасида иккинчи ва биттасида тўртинчи ўринни эгаллаб, умумжамоа ҳисобида Москва олий умумқўшин қўмондонлик билим юртидан кейинги поғонани забт этди. Учинчи ўринни эса Қозоғистон Қуруқликдаги қўшинлар ҳарбий институти жамоаси эгаллади.
Ғолиб ва совриндорлар кубок, медаль ва эсдалик совғалари билан тақдирланди.
Ўзбекистон шарафини халқаро мусобақада муносиб ҳимоя қилган ҳарбий хизматчилар Ислом Каримов номидаги Тошкент халқаро аэропортида муносиб кутиб олинди.
МДҲга аъзо мамлакатларнинг олий ҳарбий таълим муассасалари курсантлари ўртасидаги IV Халқаро олимпиадада илк бор иштирок этган Ўзбекистон Мудофаа вазирлиги вакиллари 5 та йўналиши бўйича биттадан иккинчи ва тўртинчи, учтасида эса учинчи ўринларни қўлга киритди.
Изоҳ (0)