Ўзбекистон Президентининг АҚШга расмий ташрифи доирасида бош прокурор Отабек Муродов томонидан АҚШнинг айрим ҳуқуқни муҳофаза қилувчи органларида учрашувлар ўтказилди, дея хабар бермоқда Бош прокуратура матбуот хизмати.
Хусусан, Адлия департаментида АҚШ бош прокурори ёрдамчиси Б.Шварц билан бўлиб ўтган учрашувда жиноятчиликка қарши кураш ва тергов борасида ўзаро ёрдам кўрсатиш соҳасида хамкорлик масалалари муҳокама қилинган.
Департамент вакилларига Ўзбекистонда амалга оширилаётган суд-хуқуқ ислоҳотлари, беш йиллик ривожланиш стратегияси, нисбатан қисқа давр ичида эришилган жиддий ютуқлар тўғрисида маълумот берилган.
«Америка тарафи томонидан янгиланишларга ижобий баҳо берилиб, АҚШ Адлия департаменти ва Ўзбекистон Бош прокуратураси олдига қўйилган умумий вазифаларни инобатга олган ҳолда ўзаро хамкорликни мустаҳкамлаш зарурати ва бунга қатъий тайёргарлик ифода этилди», — дейилади хабарда.
Адлия Департаментининг OPDAT ва ICITAP дастурлари доирасида жиноий таъқиб ва кадрларни ўқитиш соҳасида салоҳиятни ошириш юзасидан кўмак кўрсатишга оид ўзаро ҳамкорлик масалалари муҳокама қилинди.
Президентнинг Блаир Ҳоусе қароргоҳида Федерал қидирув бюросининг мутасадди вакиллари иштирокида Бош прокуратура ва ФҚБ ўртасида имзоланган ўзаро англашув меморандумини (Вашингтон, 04.12.2017 й.) амалга ошириш юзасидан Дастур («Йўл харитаси») имзолаш маросими бўлиб ўтди.
Изоҳ (0)