Туркманистон қонунчилигига мувофиқ чет эл фуқаролари, жумладан Ўзбекистон фуқаролари Туркманистон ҳудудига киргандан сўнг ва белгиланган манзилга етгунларига қадар, шунингдек, давлат ҳудудида турар жойи ўзгарган ҳолларда турар жойи бўйича миграция хизмати органларида мамлакатга кирган кунини ҳисобламаганда уч иш куни ичида рўйхатдан ўтишлари лозим. Бу ҳақда Ўзбекистон ТИВ маълум қилди.
Турманистон ҳудудидан транзит ўтувчи Ўзбекистон фуқаролари, агар уларнинг Туркманистонда бўлиш муддатлари кирган кунини ҳисобламаганда беш кундан ошмаса, фақат миграция назорати постларида рўйхатдан ўтади.
Халқаро йўналишларда юк ташиш билан шуғулланувчи ўзбек автотранспорт воситаларининг ҳайдовчилари, агар уларнинг Туркманистонда бўлиш муддатлари беш кундан ортиқ бўлмаган муддатни ташкил этса, фақатгина Туркманистон давлат чегарасидаги миграция назорати постларида аҳоли пунктлари йўналишида, шунингдек, белгиланган манзилларга транспорт-ташиш ишларини амалга оширишда рўйхатдан ўтади. Агар уларнинг Туркманистонда бўлиш муддати давлат ҳудудига кириш санасидан бошлаб беш кундан ортиб кетса, у ҳолда кириш санасини қўшиб ҳисоблаганда 15 кунгача бўлган муддатга Туркманистон миграция хизмати органларида рўйхатдан ўтади.
Мазкур қоидаларни бузганлик учун фуқаролар 1330 манат (380 доллар) миқдорида молиявий жаримага тортилади ҳамда икки йилдан беш йилгача бўлган муддатга мамлакатдан депортация қилинади.
Туркманистонда жамоат жойларида чекиш тақиқланади. Шунигдек, мамлакатга нос (чайналадиган тамаки) олиб кириш тақиқланади.
Изоҳ (0)