14 майдан 15 июнга қадар Халқаро меҳнат ташкилоти, Касаба уюшмалари федерацияси, Ўзбекистон Савдо-саноат палатаси ва Бандлик ва меҳнат муносабатлари вазирлиги ҳамкорлигида Ўзбекистоннинг барча ҳудудларида пахта теримига ишчи ёллашда қатнашувчи мансабдор шахслар учун тренинг курслари ташкил этилмоқда. Бу ҳақда тренинг ташкилотчилари «Дарё»га хабар бермоқда.
Мазкур ўқув курсларида вилоят ва туман пахта штаблари, ҳокимликлар, Қишлоқ хўжалиги, Сув хўжалиги, Молия, Ички ишлар, Бандлик ва меҳнат муносабатлари, Халқ таълими, Мактабгача таълим, Соғлиқни сақлаш вазирликлари, шунингдек, Ўрта махсус касб-ҳунар таълим маркази, Бош прокуратура, Фермерлар кенгаши, «Маҳалла» жамғармаси, Ёшлар иттифоқи, Хотин-қизлар қўмитаси, Касба уюшмалари федерацияси, Савдо-саноат палатасининг ҳудудий бўлинмалари вакиллари, бригадир ва фермерларнинг иштироки кўзда тутилган. Тадбир мақсади пахта терими ва бошқа ишларга одам ёллаш жараёнида иштирокчилар орасида мажбурий меҳнат хавф-хатарларини олдини олишдаги ўзаро ҳамжиҳатликка кўмаклашишдан иборат.
Тренинг иштирокчилари олдида Халқаро меҳнат ташкилоти экспертлари, Касаба уюшмалари федерацияси, Фуқароларнинг кафолатланган меҳнат ҳуқуқларини таъминлаш масалалари бўйича Парламент комиссияси мутахассислари чиқиш қиладилар. Курс доирасида шунингдек қуйидаги мавзулар ёритилади:
- Мажбурий меҳнат борасидаги миллий мажбуриятлар;
- Мавсумий ишларга фуқароларни ёллаш ва мажбурий меҳнат хавф-хатарлари: концепциялар, иштирокчи томонлар ва роллар;
- Мажбурий меҳнат хавф-хатарларини олдини олиш йўллари. Илғор тажриба.
Умуман олганда, 14 майдан 15 июнгача 7000 мутахассис иштирокида жами 193 та тренинг ўтказилади.
Мазкур тренинглар Ўзбекистон пахта теримида болалар меҳнати ва мажбурий меҳнатга қарши чоралар тизимини таҳлил этишнинг биринчи босқичини ташкил этиб, Халқаро меҳнат ташкилоти ва Жаҳон банки қўшма лойиҳаси доирасида ҳамда Европа Иттифоқи, Швейцария ва АҚШ ҳукуматлари молиявий кўмаги остида олиб борилади.
Ушбу тадбирлар фуқароларни, хусусан таълим, соғлиқни сақлаш, бюджет ташкилотлари ва бошқа корхона ва муассасаларнинг ходимлари, таълим муассасаларининг ўқувчи ва талабаларини туман ва шаҳарларни ободонлаштириш ва кўкаламзорлаштириш, қишлоқ хўжалиги ишлари ва шу каби ишларга жалб этиш асносида мажбурий меҳнатнинг барча шаклларини олдини олиш бўйича чора-тадбирлани кучайтириш доирасида амалга оширилмоқда.
Тез кунларда фермерлар орасида пахта теримига ихтиёрий ишчиларни ёллашдаги энг илғор тажриба ва инновацион ғояларни қўллаш борасида танлов эълон қилинади. Танловда барча хоҳловчилар иштирок этишлари мумкин, ғолиблар эса ноябрь ойида бўлиб ўтадиган республика даражасидаги давра суҳбатида эълон қилинади. Батафсил маълумотлар тўғрисида қўшимча равишда хабар берилади.
Изоҳ (0)