Фарғона вилояти Тошлоқ тумани ички ишлар бўлими томонидан қидирувга берилган Иномжон Сотволдиев ўз ихтиёри билан Ўзбекистонга қайтгани учун унга нисбатан қамоқ эҳтиёт чораси қўлланилмай, ота-онаси бағрига қайтарилди. Бу ҳақда Фарғона вилояти ИИБ матбуот хизматига таяниб «Дарё» мухбири Азизжон Эрматов хабар берди.
Иномжон Сотволдиевга нисбатан 2010 йил 17 ноябрда Тошлоқ тумани ИИБ томонидан Ўзбекистон Республикаси Жиноят Кодексининг 244/2-моддаси 1-қисми, 244/1-моддаси 3-қисми билан жиноят иши қўзғатилиб, қидирув эълон қилинган эди.
Сиртдан қамоқ эҳтиёт чораси қўлланилган Иномжон Сотволдиев етти йил давомида ҳуқуқни муҳофаза қилиш идораларидан яширинча Россия Федерациясининг Новосибирск шаҳрида рус миллатига мансуб аёл билан никоҳдан ўтиб, яшаб келган.
Maxсус қидирувда бўлиб, Ўзбекистонга ўз ихтиёри билан қайтаётганларни кечириш, уларни тўғри йўлга солиш борасида амалга оширилаётган ишлардан хабар топган Иномжон Сотволдиев ҳам ўз юртига қайтишга қарор қилди.
Фарғона вилояти ИИБ терроризм ва экстремизмга қарши кураш бўлими тезкор ходимлари билан телефон орқали боғланиб, «Новосибирск—Наманган» йўналишидаги самолётда яшаш манзилига қайтаётганини маълум қилди.
Иномжон Сотволдиев 2018 йил 7 май куни «Наманган» халқаро аэропортига келиб тушди. Унга нисбатан қўлланилган қамоқ эҳтиёт чораси қамоқ билан боғлиқ бўлмаган эҳтиёт чорасига ўзгартирилиб, ўз уйига, оиласи бағрига қайтарилди.
Ҳозирда тергов ҳаракатлари олиб борилмоқда.
Изоҳ (0)