АҚШ Ўзбекистон мустақиллигини тан олган биринчи давлатлардан ҳисобланади. Икки мамлакат ўртасидаги дипломатик алоқалар 1992 йил 19 февралда ўрнатилган ва Ўзбекистоннинг АҚШдаги биринчи элчихонаси 1993 йил февраль ойида очилган. Элчихона Вашингтон шаҳридаги Массачусетс авенюсида жойлашган.
1906—1909 йилларда қуриб битказилган ушбу иморат француз меъмори Жюль Анри де Сибур томонидан Луи XV услубида ишлаб чиқилган бўлиб, у бу кўчада жойлашган энг катта ва энг қимматбаҳо бинолардан ҳисобланган.
Уйнинг интерьер қисми XVI—XVIII асрлар француз ва инглиз безак элементларини ўз ичига олган. Безаклар 20—30 йил сақланган қизил дарахт билан ишланган. Олти қаватли бу бинода 80 дан ортиқ хона, 38 та камин ўчоғи, XVIII асрнинг ноёб кумуш қандиллар мавжуд.
Ички хоналарнинг содда ва мантиқий давом этиши ҳамда уларнинг услубий ўзгаришлар кетма-кетлиги, бир вақтнинг ўзида ҳам дизайн, ҳам ҳунармандчиликнинг юқори сифатини намойиш этади. Алоҳида эътибор айниқса, нозик ёғоч ўймакорлигига, гипс ва темир ишларига, шунингдек, металлдан ишланган ажойиб буюмлар ва ёритиш мосламаларига қаратилади.
Бинодан 1927 йилгача хусусий турар жой сифатида фойдаланилган бўлиб, сўнг у Канада ҳукумати томонидан сотиб олинган ва ваколатхона, канцелярия ва элчихона сифатида ишлатилган. Ўзбекистон ҳукумати мазкур бинони 1996 йилнинг ёзида сотиб олган.
Сотиб олингандан сўнг мазкур бинонинг ички қисмига баъзи ўзгартиришлар қилинган. Бинода миллийликни мужассам эттириш ва элчихонага ташриф буюрувчиларга ёғоч ўймакорлиги, ипак йигириш, шиша бўяш ва рассомлик каби Марказий Осиё санъатининг бой анъаналарини намойиш этиш мақсадида ўзбек безак элементлари ишлатилган. Жумладан, хоналар интерьерида икат, миллий либослар, чинни ва сопол идишлар каби миллий санъат намуналари маданиятлар уйғунлашувини ўзида акс эттиради.
Элчихона бу ерга кўчиб келгандан бошлаб бу жой кўп тарихий учрашувлар учун макон бўлган. Айтиб ўтиш жоиз, Массачусетс кўчасида Ўзбекистон билан бир қаторда бошқа кўп мамлакатларнинг элчихоналари ҳам жойлашган ва мазкур кўча шаҳарнинг энг нуфузли жойларидан ҳисобланади.
Шу кунларда Ўзбекистон Президентининг АҚШга давлат ташрифига жуда қизғин тайёргарлик ишлари давом этмоқда. Элчихона ходимлари, Ўзбекистон делегацияси вакиллари ва журналистлар шу ерда иш олиб бормоқда.