Германия компания ва банкларининг 70 дан ортиқ вакилларидан иборат делегация 14—16 май кунлари Ўзбекистонда бўлади. Бу ҳақда «Жаҳон» ахборот агентлигига асосланиб, Sputnik хабар берди.
Ташриф Ўзбекистоннинг Германиядаги элчихонаси томонидан Немис иқтисодиёти шарқий қўмитаси ва немис—ўзбек ишбилармонлар кенгаши билан ҳамкорликда ташкил этилмоқда.
Банклар ва автомобиль, кимё, электротехника, туризм ва қурилиш, қишлоқ хўжалиги машинасозлиги, хизматлар ва бошқа соҳалар вакилларидан иборат делегация икки мамлакат ҳамкорлиги тарихидаги энг катта делегация бўлади. Делегация таркибидан Siemens, MAN, BASF, TUI Group, SAP, Deutsche Bank ва Commerzbank ҳамда Ўзбекистон ишбилармонлари билан ҳамкорликни йўлга қўйишга қизиққан кичик ва ўрта бизнес корхоналари вакиллари ўрин олган.
Ташриф доирасида 15 май куни Тошкентда немис—ўзбек ишбилармонлар кенгашининг IV йиғилиши, бизнес-форум ва кооперацион биржа ўтказилади. Бундан ташқари, делегация аъзолари Бухоро вилоятидаги Knauf Гипс заводи ишлаб чиқариш линиясининг очилиш маросимида иштирок этишади ҳамда немис саноат зонаси яратилиши режалаштирилаётган Тошкентдаги собиқ «Алгоритм» заводига ташриф буюришади.
Хабарда айтилишича, Ўзбекистондаги қатор корхоналар вакиллари билан учрашувлар ўтказиш, ҳамкорлик масалаларини муҳокама қилиш учун республика вилоятларига ташриф буюриш ҳам режалаштирилган. Тадбирлар якунларига кўра томонлар қўшма лойиҳаларни амалга оширишга қаратилган келишувларни имзолаши кўзда тутилган.
Изоҳ (0)