Ироқда парламент сайловлари вақтида теракт уюштиришни ният қилган икки худкуш йўқ қилинди

Ироқнинг Дияла вилояти ҳуқуқ-тартибот органлари бугун, 12 май куни бошланган парламент сайловларида теракт уюштиришни режалаштирган икки нафар террорчи-худкушни йўқ қилди. Бу ҳақда маҳаллий қонунчилик мажлисининг хавфсизлик қўмитаси раҳбарига асосланиб, «РИА Новости» хабар берди.

Унинг сўзларига қараганда, теракт уюштиришни режалаштирган шахслар автоматлар билан қуролланган ва «худкуш камари»ни тақиб олган бўлган. Террорчилар парламент сайловлари бошланишидан бир неча соат олдин, Дияла вилоятидаги қишлоқлардан бирида йўқ қилинган.

Ироқда парламент сайловлари 12 май куни маҳаллий вақти билан соат 07:00 дан бошланган. Сайловлар мамлакатда ИШИД террорчилик ташкилоти босқинидан сўнг биринчи марта бўлиб ўтмоқда.

Ироқ Олий мустақил сайлов комиссиясининг маълумотларига кўра, мамлакатдаги 36 миллион аҳолининг 24 миллиони янги депутатларни сайлаш жараёнида иштирок этиши мумкин. Таъкидланишича, парламентдаги 329 та депутатлар ўрнини эгаллаш учун 7 мингдан зиёд одам ўз номзодини қўйган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.