Измир шаҳри бош прокуратураси давлат тўнтаришига уриниш ва «Фатҳуллоҳчилар террорчилик ташкилоти» (FETO) фаолияти борасида очилган жиноий иш доирасида 96 кишини ҳибсга олиш учун ордер чиқарди. Бу ҳақда «ТАСС» хабар берди.
Хабар қилинишича, уларнинг аксарияти — хизматдан четлаштирилган ҳарбийлар. Айни кунча 65 киши қўлга олинган. Ҳибсга олиш ишлари Измир ва Туркиянинг 14 вилоятида олиб борилмоқда.
Гумон қилинаётганларнинг беш нафари FETO фаолиятини мувофиқлаштирувчи имомлар ҳисобланади. Улар мамлакат ҳарбий-ҳаво кучлари офицерлари билан алоқа ўрнатганликда гумон қилинмоқда.
Эслатиб ўтамиз, 2016 йил 15 июль куни Туркия ҳарбий-ҳаво кучларининг бир гуруҳ аскар ва офицерлари давлат тўнтаришини амалга оширишга уриниш қилган. Асосий воқеалар Истанбул ва Анқара шаҳарларида юз берган. 250 киши ҳалок бўлган. 2 мингдан ортиқ киши яраланган.
Тўнтариш ташкилотчиси сифатида сиёсатчи ва диний раҳнамо Фатҳуллоҳ Гулен гумон қилинмоқда. Гулен 1999 йилдан буён АҚШда яшаган.
Қўзғолондан кейин 50 минг киши ҳибсга олинган. Давлат муассасалари 140 минг кишини ишдан четлаштирган.
Изоҳ (0)