TravelAsk фаровон турмуш излаб, қайси мамлакатларга интилаётгани ва қаерларда энг кўп миқдорда муҳожирлар яшаётгани ҳақида маълумот тўплаб тақдим этди.
АҚШ
Бежиз АҚШ муҳожирлар мамлакати дейилмайди. Қўшма штатлар муҳожирлар сони бўйича кўп йиллардан буён етакчилик қилиб келади. Бу ерга кўчиб келганлар сони йил сайин ортиб бормоқда. 2016 йил маълумотларига кўра, аҳоли орасида муҳожирлар сони 43,7 миллион кишини, яъни мамлакат аҳолисининг 13 фоизини ташкил этган. Муҳожирларнинг аксарияти Мексика ҳамда Марказий ва Жанубий Америка мамлакатларидан кўчиб келган. Иккинчи ўринни Осиё мамлакатлари эгаллаган бўлиб, уларнинг орасида Хитой етакчилик қилади. Европа ва Африкадан келадиган муҳожирлар оқими у қадар катта эмас.
Германия
Муҳожирлар сони бўйича иккинчи ўринни Германия банд қилган. Бу ерга кўчиб келганлар сони 12 миллион киши ёки умумий аҳолининг 15 фоизини ташкил қилади (2015 йил маълумоти). Германия Европанинг иқтисодий жиҳатдан энг ривожланган мамлакати ҳисобланади, шунинг учун бу ерга бошқа мамлакатлардан кишилар ўз моддий аҳволини яхшилаш учун кўчиб келади. Асосан Туркия, Польша, Руминия, Венгрия, Италия, Европа ва Яқин Шарқнинг бошқа мамлакатлари фуқаролари кўчиб келади. Германияда Россия ва Қозоғистондан кўчиб келган, асли келиб чиқиши немис бўлган муҳожирлар ҳам талайгина.
Россия
Муҳожирлар сони бўйича Россия учинчи ўринни эгаллайди. Одатда Россияга МДҲ таркибига кирувчи Ўзбекистон, Украина, Қозоғистон сингари мамлакатлардан муҳожирлар келади. Уларнинг сони 11 миллион киши ёки умумий аҳолининг 8 фоизини ташкил қилади.
Яқин Шарқнинг нефть ишлаб чиқарувчи мамлакатлари
Муҳожирлар орасида машҳур бўлган давлатлар сирасига Яқин Шарқнинг Саудия Арабистони, Бирлашган Араб Амирликлари, Кувайт ва Қатар сингари бадавлат мамлакатлари ҳам киради. Асосан Ҳиндистон, Хитой, шунингдек, Яқин Шарқ ва Африка қитъасининг ривожланмаган ҳудудларидан муҳожирлар кўчиб келади. Яқин Шарқ мамлакатлари муҳожирларнинг аҳоли орасидаги улуши бўйича етакчи ўринни эгаллайди. Масалан, Бирлашган Араб Амирликларида бу кўрсаткич 88 фоиз, Қувайтда 73 фоиз, Саудия Арабистонида 30 фоиздан зиёдни ташкил қилади.
Австралия
Муҳожирлар мамлакатларидан яна бири — Австралия. Жануби-Шарқий Осиё, асосан Хитой, Ҳиндистон, Вьетнам, Филиппиндан келган муҳожирлар кўпчиликни ташкил қилади. Бироқ муҳожирларнинг асосий қисми – Буюк Британия ва Янги Зеландия каби инглиззабон мамлакатлар фуқаролари. Уларнинг сони 1,5 миллиондан ортиқдир. Австралия муҳожирларининг умумий сони 6 миллиондан зиёдни ташкил қилади.
Дунёнинг бошқа мамлакатларидан Канада, Буюк Британия, Франция, Испания ва Италияни муҳожирлар сони юқори бўлган давлатлар сифатида келтириш мумкин.
Изоҳ (0)