Ўзбекистонда аёллар ҳуқуқини илгари суриш бўйича институционал механизм янги йўналишларга эга бўлади. Бу ҳақда 25 апрель куни Тошкентдаги Intercontinental меҳмонхонасида ўтказилган халқаро конференция давомида Бош вазир ўринбосари, Ўзбекистон Хотин-қизлар қўмитаси раиси Танзила Норбоева маълум қилди, деб ёзади Sputnik.
Ўзбекистон Касаба уюшмалари Федерацияси томонидан ташкиллаштирилган ва 50 га яқин давлатлардан халқаро экспертлар қатнашган «Ҳаракатлар стратегияси ва кучли ижтимоий сиёсат: халқаро амалиёт ва Ўзбекистон тажрибаси» халқаро конференциясида сўзга чиққан Норбоева Ўзбекистон Хотин-қизлар қўмитасининг аёлларнинг ижтимоий фаоллигини ошириш борасидаги фаолияти ҳақида маълумот берди.
«Ўзбекистонда аёллар ҳуқуқини илгари суриш бўйича институционал механизм янги йўналишларга эга бўлади. Албаттаки, Ўзбекистон Қонунчилик палатасида: юқори ва қуйи палаталарда аёлларимизнинг бугунги иштироки шу кеча-ю-кундузда аёллар ўз олдига қўйган талабларга мутлақо жавоб бермайди. Бу аёлларимизнинг фаоллигига мутлақо мос эмас.Яъни, олий даражада аёлларимизнинг 15, 16, 17 % ўринларни эгаллашлари биз учун эмас, Ўзбекистон учун эмас», — деди Норбоева.
Ўзбекистон бош вазир ўринбосари, шу ўринда, 2019 йилда бўлиб ўтадиган сайловларда давлат бошқарув органларида аёллар 30 фоизни ташкил этишларига қонунан эришишни мақсад қилиб қўйилганини маълум қилди.
Норбоеванинг сўзларига кўра, бунинг учун Хотин-қизлар қўмитаси Давлат бошқарув академияси, Инсон ҳуқуқлари бўйича миллий марказ, Омбудсман ва бошқа сиёсий партиялар билан яхши ҳамкорлик муносабатларини йўлга қўйган.
«Албатта, бўлажак сайловларга тайёр бўлиш учун турли дастурлар ишлаб чиқилган», — деб маълум қилди бош вазир ўринбосари.
Изоҳ (0)