26 апрель — Ўзбекистон Халқ шоири Муҳаммад Юсуф туғилган кун. Шу муносабат билан республика бўйлаб турли тадбирлар ўтказилмоқда, матбуотда адабий танқидчилар ва ижодкорлар Муҳаммад Юсуф ижодига бағишланган мақолалар эълон қилмоқда. Жумладан, 24 апрель куни Ўзбекистон Ёзувчилар уюшмасида Маданият, Олий ва ўрта махсус таълим вазирликлари ҳамда Алишер Навоий номидаги Ўзбекистон Миллий кутубхонаси ҳамкорлигида Ўзбекистон халқ шоири Муҳаммад Юсуф таваллудига бағишланган «Улуғимсан, Ватаним!» деб номланган ижодий кеча бўлиб ўтди.
Ўзбекистон халқ шоири Муҳаммад Юсуф 1954 йили Андижон вилоятида деҳқон оиласида таваллуд топган. Тошкентдаги Рус тили ва адабиёти институтида (ҳозирги Жаҳон тиллари университети) таҳсил олган. Республика китобсеварлар жамияти, «Тошкент оқшоми» газетаси, Ғафур Ғулом номидаги Адабиёт ва санъат нашриёти, «Тафаккур» журнали ҳамда «Ўзбекистон овози» газетасида хизмат қилди. Ўзбекистон Республикаси Президенти ҳузуридаги Давлат бошқаруви академиясида таҳсил олгач, 1998 йилдан умрининг охиригача Ўзбекистон Ёзувчилар уюшмасида фаолият кўрсатди.
Унинг «Таниш тераклар», «Булбулга бир гапим бор», «Илтижо», «Уйқудаги қиз», «Ҳалима эна аллалари», «Ишқ кемаси», «Кўнглимда бир ёр», «Бевафо кўп экан», «Эрка кийик», «Сайланма», «Биз бахтли бўламиз», «Осмонимга олиб кетаман», «Улуғимсан, Ватаним» сингари ўндан ортиқ шеърий тўплами ўзбек адабиётининг олтин меросига айланган.
Изоҳ (0)