ЎФА ҳакам Олим Толибжоновни Про-Лига ўйинларидан номаълум муддатга четлаштирди. Бу ҳақда ташкилот расмий сайтида хабар берилди.
Қайд этилишича, Олим Толибжонов Про-Лиганинг 3-тур доирасида «Ғиждувон» – «Ифтихор» учрашувини бошқарган. Унинг ўйинлардан четлатилишига мазкур беллашувдаги ҳаракатлари учрашув назоратчи ҳаками Шамил Жумаев томонидан яна 2 баллга («4») баҳоланиши сабаб бўлган.
Ўйин назоратчи ҳакамининг билдиргисига биноан Ҳакамлар ва назоратчилар қўмитаси ушбу масалани ўрганиб чиқди ва «Ҳакамларнинг тартиб-интизом кодекси»га биноан қарор чиқарди. Унга кўра, Олимжон Толибжонов номаълум муддатга Про-Лига ўйинларидан четлаштирилди.
Бу Олим Толибжоновнинг биринчи марта ўйинларда четлатилиши эмас. Ўтган мавсумда Толибжонов «Шўртан» – «Навбаҳор» учрашувини бошқариб, якунда назоратчи Алишер Абдуллаев томонидан қониқарсиз (4,0) баҳо олган. Ҳакамлар ва назоратчилар қўмитаси қарорига биноан Ўзбекистон чемпионати, биринчилиги ва Ўзбекистон Кубоги ўйинлари доирасидаги 10 та ўйинга четлатилганди.
Изоҳ (0)