2018 йилнинг апрелидан сентябрига қадар МДҲга аъзо давлатларнинг дўстона армиялари доирасида ҳарбий-амалий спорт турлари бўйича мусобақалар ўтказилиши режалаштирилган, дея хабар бермоқда Ўзбекистон Мудофаа вазирлиги матбуот хизмати.
Ушбу режа доирасида Ўзбекистон Мудофаа вазирлиги ҳарбий хизматчилари подполковник Баҳодир Тўхтаназаров, Зокир Хазиев, майорлар Мадиёр Саидов, Шерзод Рашидов, капитанлар Аваз Усмонов, Бахтиёр Мадаминов, Одилбек Юлдашев, Ҳусниддин Элмуродовдан иборат жамоа 16—20 апрель кунлари Россияда бўлган ҳарбий-амалий спорт турининг «Командирлик стартлари» йўналиши бўйича мусобақада иккинчи ўринни эгаллади.
Хабар беришларича, ЦСКА (Марказий ҳарбий спорт клуби)нинг «Игровой» универсал спорт мажмуасида ўтказилган мусобақаларда Беларусь, Қозоғистон, Қирғизистон, Арманистон, Ўзбекистон ва Россия ҳарбий хизматчилари иштирок этган.
Чемпионат дастуридан иккита жамоавий спорт турлари ва тўртта якка тартибда бўйича ҳар бири учун алоҳида комплекс машқлар жамланган уч ёш тоифа йўналишида ўтказилган. Мусобақаларни тўртта ҳакамлар бригадасидан иборат 58 нафар спорт ҳакамлари баҳолаб борди.
Мусобақада иштирокчилар эстафета югуриш (4х400), тўрткураш (сузиш, пистолетдан ўқ отиш, турникда тортиниш 3000, 2000 ва 1000 метр масофаларга югуриш)дан куч синашди.
2000 метр масофага югуришда майор М.Саидов 6.04 дақиқа натижа билан олтин медалга эришган бўлса, капитан Д.Мадаминов 6.22 дақиқага келиб учинчи бўлди.
Эстафета югуришда 3,42,2 дақиқада келган Беларусь вакиллари биринчиликни қўлга киритган бўлса, ўзбекистонлик ҳарбийлар 3,44,2 дақиқа натижа билан россияликлардан (3,44,5) олдин бўлди.
Тўрткураш мусобақасида Ўзбекистон вакиллари 2-ўринга сазовор бўлди. Бригада командирлари ўртасида подполковник З.Хазиев, батальон командирлари ўртасида майор М.Саидов ва взвод командирлари ўртасида капитан А.Усмонов шахсий биринчиликда учинчи бўлди.
Ўзбекистон ҳарбийлари чемпионатда жами 1 та олтин, 14 та кумуш ва 5 та бронза медалини қўлга киритиб, умумжамоа ҳисобида иккинчи бўлди — биринчи ўринни Россия, учинчи ўринни эса Беларусь ҳарбийлари эгаллади.
Совриндор жамоа 21 апрель куни Тошкент аэропортида тантана билан кутиб олинди.
Маълумот учун, Ўзбекистон Мудофаа вазирлиги ҳарбийлари 2017 йили ушбу ҳалқаро мусобақада кузатувчи сифатида иштирок этган эди. 2018 йилдан ҳарбий-амалий спортнинг қолган олти тури «Армия қўл жанги», «Спорт ориентирланиши», «Тоғ уч кураши», «Кўп кураш ҳарбий спорт комплекси», «Офицерлар уч кураши» ва «МП-3 ва КА-3 машқларида штатдаги ёки штатга илова қилинган жадвалдаги қуроллардан отиш» бўйича мусобақаларда иштирок этиш учун Ўзбекистон ҳарбий хизматчилари тайёргарлик кўришмоқда.
2018 йил сентябрида Ўзбекистонда биринчи марта МДҲга аъзо давлатлар дўстона армиялари доирасида «Армия қўл жанги» йўналиши бўйича чемпионат ўтказилиши режалаштирилган.
Изоҳ (0)