«Давергеодезкадастр» қўмитаси, ер тузиш ва ундан оқилона фойдаланишни назорат қилиш ҳамда аҳолига интерактив хизмат кўрсатиш мақсадида Ер ахборот тизими (ЕАТ1)ни жорий этмоқда. Бу ҳақда қўмита матбуот хизмати хабар берди.
Ушбу ЕАТ1 тизими орқали харита тузиш ишларини инсон омилини камайтириш ҳамда юқори аниқликда маълумотлар олиш учун замонавий технологиялардан, яъни масофадан зондлаш (ремоте сенсинг), Глобал навигацион сунъий йўлдошлар тизимларидан (ГНСС) фойдаланиб, мавжуд маълумотларга солиштириш орқали ноқонуний эгалланган майдонларни аниқлаш, навбатчи қишлоқ хўжалиги хариталарини юритиш, ҳар йиллик ҳосил учун қишлоқ хўжалик экинларини жойлаштириш, қишлоқ хўжалиги экинлари экилган майдонларда мониторингини олиб бориш, таҳлил қилиш ва прогнозлаш ишлари ва энг асосийси, давлат кадастрлари ягона тизимини юритиш учун асосни яратишни автоматлаштиришдан иборат.
Жумладан, тизимда нафақат давлат кадастрлари ягона тизимини юритиш маълумотларини тўплаш, таҳлил қилиш, балки шу маълумотлар асосида аҳолига интерактив хизматлар тақдим этиш ҳам кўзланган.
Аҳолига интерактив хизмат кўрсатиш бўлими 5 та модулдан иборат. Улар қуйидагилар:
- «Тадбиркорлар учун»;
- «Саёҳат»;
- «Менинг юртим — менинг харитам»;
- «Интерактив ўқув хариталари»;
- «Келажак харитаси».
Бундан ташқари мазкур модулда ўзини қизиқтирган бўш ер майдонини олиш ва электрон аукционда иштирок этиш порталига чиқиш гиперҳаволаси мавжуд. Бу эса тизим ишлашида шаффофликни таъминлаб, ер участкасини олиш билан боғлиқ ноқонуний хатти-ҳаракатларнинг олдини олади.
«Саёҳат» модули, республикада туризмни ривожлантириш мақсадида барча диққатга сазовор жойлар, музейлар ва дам олиш зоналари ва улар атрофига яқин меҳмонхона, ресторан, кафе ва бошқа объектлар тўғрисида тўғри ва тўлиқ маълумотлар олиш ҳамда маршрутни белгилашдан иборат.
«Менинг юртим — менинг харитам» акциясида мамлакатнинг ҳар бир фуқароси ижтимоий тармоқлардаги аккаунтлари орқали ёки тизимда рўйхатдан ўтиб, ўзлари билган жойлар тўғрисида маълумот киритиши ёки мавжуд маълумотларни таҳрирлаш имконига эга бўлишади. Киритилган маълумотлар қўмита мутахассислари томонидан кўриб чиқилади ва ҳар ойда «энг кўп маълумот киритган сайт аъзоси», «энг тўғри маълумот киритган сайт аъзоси» номинациялари бўйича маълумотлар бериб борилади.
Ҳозирда мавжуд статистик маълумотлардан фойдаланган ҳолда «интерактив ўқув хариталари» яратиш, мактаб ўқувчисидан тортиб то соҳада фаолият олиб бораётган ходим ўзи учун керакли ва қизиқарли бўлган маълумотларни тез, аниқ ва қулай усулда олиш имконига эга бўлишади.
«Келажак харитаси» бу яқин келажакда (2019 йил май ойларида) Ўзбекистоннинг бой тарихи ҳамда табиатини тўлалигича кўрсатиб берадиган интерактив уч ўлчамли анимацион хариталар яратиш ишларига мўлжалланган.
Лойиҳа 2018—2020 йилларга мўлжалланган бўлиб, унинг дастлабки босқичи 2019 йил апрель ойида (халқаро Ер куни байрамига бағишлаб) ишга туширилади.
«Давергеодезкадастр» қўмитаси ЕАТ1 тизимининг аҳолига интерактив хизмат кўрсатиш бўлимини тест шаклидаги кўринишини жорий йилнинг 1 июлидан «xarita.ygk.uz» веб саҳифаси орқали тақдим этиб боради. Тизимнинг мобил иловасини ҳам юқоридаги манзилдан топиш мумкин.
Изоҳ (0)