Арманистон президенти Армен Саркисян пойтахт Ереваннинг Республика майдонида бўлиб ўтаётган норозилик намойиши иштирокчилари билан учрашди, дея хабар бермоқда Meduza.
«Panarmenian.net» сайтининг қайд этишича, у намойишчилар етакчиси — депутат Никол Пашинян билан 10 дақиқача мулоқотда бўлган, сўнг улар «илиқ хайрлашган» ва президент жўнаб кетган.
Улар нима ҳақида гаплашгани ҳозирча номаълум.
«Ўз автомобили томон йўналаркан, президент Саркисян журналистлардан бирининг томонлар ўртасида музокаралар бўлиб ўтадими, қабилидаги саволига: ‘Умид қиламан’, дея жавоб қайтарди», — деб ёзади «Panarmenian.net».
Ереванда сўнгги икки ҳафтадан бери Серж Саргсяннинг бош вазир этиб тайинланишига қарши норозилик намойишлари бўлиб ўтмоқда — Саргсян сўнгги 10 йил давомида мамлакатга президентлик қилган. Намойишчилар 17 апрель куни бош вазир лавозимига тасдиқланган Саргсяннинг истеъфога чиқарилишини талаб қилмоқда.
Намойишчилар Еревандаги кўчаларни ёпиб қўймоқда. Полиция ҳар куни ўнлаб, баъзан юзлаб одамларни қўлга олмоқда. 21 апрель куни намойишларнинг координаторларидан бири Армен Григорянга оммавий тартибсизликлар келтириб чиқариш айблови илгари сурилди.
Саргсяннинг президентлик даврида Арманистон президентлик республикаси эди, бироқ 2015 йили конституциявий ислоҳотлар ўтказилган бўлиб, энди мамлакатнинг амалдаги раҳбари бош вазир ҳисобланади.
Изоҳ (0)