Тошкент шаҳри ҳудудида ёз ойлари яқинлашиши билан белгиланмаган жойларда ностандарт ҳажмдаги идишларда турли ичимликларни сотиш, санитария талабларига жавоб бермайдиган қишлоқ хўжалиги маҳсулотлари, хусусан, мева-сабзавотлар, чорва моллари ва парранда гўштларинининг ноқонуний савдоси билан шуғулланиш ҳолатлари кўпайиб кетади. Бу ҳақда шаҳар ҳокимлиги ахборот хизмати хабар бермоқда.
Бундай ҳолатларнинг олдини олиш мақсадида Тошкент шаҳар ҳокимининг «Тошкент шаҳри ҳудудида ноқонуний савдоларни бартараф этиш, мавсумий савдо ва умумий овқатланиш тармоғи объектлари фаолиятини тартибга солиш чора-тадбирлари тўғрисида»ги қарори қабул қилинди.
Мазкур қарор ижросини таъминлаш мақсадида 2018 йилнинг 1 майидан бошлаб пойтахтдаги деҳқон бозорлари, савдо комплекслари ва ихтисослаштирилган бозорлар ҳудудида, санитария талабларига жавоб бермайдиган жойларда озиқ-овқат ва ноозиқ-овқат маҳсулотлари, салқин ичимликлар, турли таомлар билан ноқонуний савдо қилиш ҳолатларига чек қўйилади.
Бозорлар ва унинг ҳудудида фаолият юритаётган тадбиркорлар ва ишчи-хизматчиларнинг тиббий кўрикдан ўтганлиги, махсус иш кийимлари билан таъминланганлиги, маҳсулотларни сақлаш ва сотиш қоидаларига риоя қилиниши, иш жойларининг санитария ҳолатига тўлиқ жавоб берилиши назоратга олинади.
Шунингдек, деҳқон бозорлари ва шоҳобчалари ҳудудида гўшт, сут, парранда тухуми, салат ва қандолат маҳсулотлари савдоси амалга ошириладиган расталарда совутгич ускуналарининг бўлиши ва доимий ишлаши юзасидан текширувлар олиб борилади.
Изоҳ (0)