ОЧЛда гуруҳда қолиб кетган «Локомотив» бош мураббийи ўз хоҳиши билан истеъфога чиқди

Тошкентнинг «Локомотив» клуби бош мураббийи Андрей Микляев ўз хоҳишига кўра истеъфога чиқди. Бу ҳақда клуб расмий сайтида хабар берилди.

«Локомотив» барча мусобақаларда муносиб иштирок этишни мақсад қилган эди. Лекин айни пайтга келиб, жамоа Суперлигада 9-ўринни эгаллаб турибди. Қолаверса, Осиё Чемпионлар Лигасидаги иштирокини ҳам эрта якунлади. Ҳолбуки «Локомотив» раҳбарияти жамоа олдига ОЧЛда гуруҳдан чиқиш вазифасини қўйган эди. Ҳам ички, ҳам халқаро майдондаги натижалар қониқарсиз кўриниш олгани сабабли, «Локомотив» бош мураббийи вазифасида ишлаб келган Андрей Микляев ўз хоҳишига кўра истеъфога чиқди. Бош мураббий вазифасини вақтинча бажариш масъулияти Андрей Фёдоровга ишониб топширилди. Унга мураббийлар штабида Мирко Еличич ҳамда Темур Кападзе ёрдам беришади, —

дейилади клуб баёнотида.