8 апрель куни Ўзбекистонда рўй берган уч ЙТҲда тўққиз киши ҳалок бўлди

8 апрель куни Ўзбекистонда рўй берган уч ЙТҲда тўққиз киши ҳалок бўлди. Бу ҳақда, Ўзбекистон ИИВга асосланиб, «Газета.uz» хабар бермоқда.

Ўша куни соат 15:20 да Қорақалпоғистоннинг Тўрткўл туманида 1972 йили туғилган Ш. Атажонов бошқарувидаги Cobalt автомобили йўл четида ағдарилиб кетди. Ҳайдовчи воқеа жойида ҳалок бўлди, унинг рафиқаси ва вояга етмаган ўғли эса шифохонада ҳаётдан кўз юмди. Ш. Атажоновнинг опаси У. Атажонова вояга етмаган набираси билан шифохонага ётқизилди.

Соат 17:05 да Наманган вилоятининг Косонсой туманида 1996 йили туғилган фуқаро М. Мухторов Nexia автомобилини бошқариб кетаётиб олдинда кетаётган Matiz’га урилиб кетди. Сўнг у бошқарувни қўлдан чиқариб, қарама-қарши ҳаракатланиш бўлагига чиқиб кетди ва «ВАЗ-2107» машинасига урилди. Тўқнашувдан сўнг «ВАЗ»да ёнғин келиб чиқди. Унинг ҳайдовчиси ва икки йўловчиси воқеа жойида ҳалок бўлди. Учинчи йўловчи ва Nexia ҳайдовчиси шифохонага ётқизилди. Кўрсатилган ёрдамга қарамай, «ВАЗ»нинг учинчи йўловчиси ҳам шифохонада ҳаётдан кўз юмди.

Соат 21:30 да Тошкент вилоятининг Чиноз туманида 1992 йили туғилган фуқаро Ж. Ғаниев бошқарувидаги Lacetti «Москвич-412»га урилди. Натижада «Москвич» қарама-қарши ҳаракатланиш бўлагига чиқиб кетиб, Истана автомобилига урилди. «Москвич»нинг икки йўловчиси воқеа жойида ҳалок бўлди, ҳайдовчи, шунингдек, Ж. Ғаниев шифохонага ётқизилди.

Эслатиб ўтамиз, 7 апрель куни Самарқандда рўй берган ЙТҲда саккиз киши ҳалок бўлган эди.