Ўзбекистон Республикаси Халқ таълими вазирлиги матбуот хизматининг маълум қилишича, эндиликда умумтаълим мактаби ўқувчилари ўз билимини янги инновацион олимпиадада намойиш этади, деб ёзмоқда ЎзА.
Халқ таълими вазирлиги томонидан иқтидорли ўқувчилар ўртасида соғлом рақобат муҳитини шакллантириш, ўзаро дўстона муносабатларни мустаҳкамлаш, ўғил-қизларнинг интеллектуал салоҳиятини ривожлантириш, уларнинг фанлар бўйича олган билимларини кенг намоён этишига имконият яратиш мақсадида жорий йилдан бошлаб инновацион олимпиада ташкил этилмоқда.
Мазкур олимпиада шу кунгача ўқувчилар ўртасида ўтказилган фан олимпиадаларидан олинган тажриба, қолаверса, ота-оналар, кенг жамоатчилик вакиллари ва экспертларнинг таклиф, мулоҳазаларига кўра ташкил этилди.
Яна бир муҳим жиҳати, вазирлик инновацион олимпиадани адолатли, ошкора ва шаффоф ташкил этиш, ҳаққоний баҳолашни таъминлаш, жаомаотчилик назорати учун кенг имконият яратилган.
Жумладан, тест синовлари онлайн тарзда Республика ташкилий қўмитаси томонидан тақдим этилган электрон дастур ёрдамида ўтказилади.
Инновацион олимпиаданинг барча босқичларида ташкилий қўмита, ҳайъат аъзоларининг фарзандлари, ўқувчилари ёки яқин қариндошлари иштирок этаётган бўлса, ушбу шахслар тегишли қарор асосида ташкилий қўмита ёки ҳакамлар ҳайъати аъзолари таркибидан чиқарилади.
Танловнинг адолатли ўтказилганлигига шубҳа туғилса, ғолиблар ёки бошқа қатнашчиларнинг ишлари жамоа раҳбарлари, иштирокчилар ва уларнинг ота-оналарига кўрсатилиши мумкин.
Шунингдек, инновацион олимпиадада ғолибликни қўлга киритган ўқувчилар келгусида нуфузли, халқаро миқёсда ўтказиладиган фан олимпиадаларида мамлакат номидан иштирок этишга тавсия этилади.
Ушбу лойиҳани амалиётга татбиқ этишда мутахассислар, педагоглар, ота-оналар ва кенг жамоатчиликнинг фикри ўрганиб борилади. Конструктив таклиф ва мулоҳазалар асосида олимпиадани ўтказиш тартибига ўзгартириш киритиш мумкин.
Ҳозирда инновацион олимпиаданинг ҳудудий босқичлари якунланди. Республика босқичи шу йилнинг 14—15 апрель кунлари еттита ҳудудда бўлиб ўтади.
Инновацион олимпиада ўтказилиш жараёнлари, натижалари тўғрисида ахборотлар, тест саволлари намуналари вазирликнинг www.uzedu.uz расмий сайтида эълон қилиб борилади.
Изоҳ (0)