АҚШ прокуратураси Филадельфияда яшайдиган ўзбекистонликни терроризмни молиялаштирганликда айблади. Тергов маълумотларига кўра, у террорчилик ташкилотига 300 доллар кўчириб ўтказиш учун кодли сўзлар ва бошқа шифрлаш усулларидан фойдаланган, деб ёзади Forum Daily.
Аммо унинг адвокатлари шу тариқа у шунчаки танишига қарзини қайтарганини даъво қилмоқда.
Бахтиёр Жумаев олти йил аввал Филадельфиядаги хонадонида ҳибсга олинган. У террорчилик ташкилотига моддий ёрдам бериш мақсадида тил бириктирганликда айбланмоқда. Тергов маълумотларига кўра, у яна бир ўзбекистонлик Жамшид Мухторов (у ҳам ушбу иш бўйича жавобгар сифатида судланмоқда) билан АҚШда битта уйда ижарада турган вақтда дўстлашиб қолган. Улар телефон суҳбатлари ва электрон мактубларида кодли сўзлардан фойдаланиб, «Ислом жиҳоди иттифоқи» номли террорчилик гуруҳини муҳокама қилган.
Қўлга олингач, Жумаев ўз айбига иқрор бўлиб, террорчилик гуруҳларига пул юбориш ва кодли сўзлардан фойдаланиш жиноят эканлигини билганлигини айтган.
Айбловчилар сўзларига кўра, эркаклар кўплаб мамлакатларда мусулмонларнинг ҳуқуқлари чеклаб қўйилиши ҳақидаги хулосага келгач, бундай ишга қўл урган.
Аммо Жумаевнинг адвокати у Мухторовдан ўз вақтида 500 доллар қарз олгани ва ўшани қайтариб берганини, ушбу транзакция эса нотўғри талқин қилинганини айтмоқда.
Алоҳида суд қилинаётган Мухторов эса 2012 йилда Чикаго аэропортида ҳибсга олинган. Унинг телефонидан террорчилик ташкилотларининг тарғибот видеолари топилган. Эркак айбловларни рад этмоқда.
Изоҳ (0)