Кеча, 28 март куни Миллий олимпия қўмитасида Ўзбекистон Республикаси Президентининг спортга оид фармон ва қарори ижросини жадаллаштириш, самарали ва сифатли ишлаши учун амалга оширилаётган ишларни назорат қилиш борасида йиғилиш бўлиб ўтди, деб хабар берди МОҚ матбуот хизмати.
Йиғилишда Ўзбекистон Миллий олимпия қўмитаси Президенти Умид Аҳмаджонов, Ўзбекистон Жисмоний тарбия ва спорт вазири Шоакрам Исроилов, вазирнинг биринчи ўринбосари Ойбек Қосимовлар иштирок этди.
Қайд этилишича, спортнинг кўплаб турларида Ўзбекистон терма жамоалари учун хориждан кучли мутахассисларни жалб қилиш борасида иш бошлаб юборилган. Жумладан, спортнинг эшкак эшиш, енгил атлетика, велоспорт, бадиий гимнастика, дзюдо, карате, оғир атлетика, қиличбозлик, сузиш, ўқ отиш, таэквондо ҳамда теннис турларида кучли мутахассислар номзоди кўриб чиқилмоқда.
Маълумки, бу йил ўзбекистонлик спортчилар Жакартадаги Осиё ўйинларида, шунингдек, Буэнос-Айрес шаҳрида бўлиб ўтадиган III ўсмирлар Олимпия ўйинларида иштирок этади. Мазкур катта спорт мусобақаларига муносиб тайёргарлик кўриш мақсадида МОҚ ва вазирлик ходимлари иштирокида иккита махсус комиссия ташкил қилинган. Комиссия мазкур спорт мусобақаларида иштирок этадиган спортчиларни мусобақага тайёрлайди.
Бундан буён Олимпия захиралари коллежларида ўқувчиларни овқат билан таъминлаш, ҳар бир спорт турига алоҳида рацион белгилаш масаласида бошқача тизимда иш кўриб чиқилиши йиғилишда маълум қилинди. Аввалги тизим эса ўзини оқламагани йиғилиш иштирокчилари томонидан қайд этилди.
Умид Аҳмаджонов болалар ва ўсмирлар спорт мактабларида ёш спортчиларнинг ота-оналаридан пул йиғиб олиш ҳолатлари ҳақида ҳам гапира туриб шундай дейди:
Давлат болалар ва ўсмирлар спорт мактабларида фаолият олиб бораётган мураббийларнинг маоши учун миллиардлаб пул ажратади. Улар эса маошдан ташқари ёш спортчиларнинг ота-оналаридан ҳам пул оладилар. Ушбу ҳолат ўз навбатида норозиликларга сабаб бўлмоқда. Бу борада аниқ тизим ишлаб чиқишимиз керак. Бу бизнинг энг оғриқли нуқталаримиздан биридир.Умид Аҳмаджонов, МОҚ президенти
БЎСМлардаги иш тизимини йўлга қўйиб олишимиз шарт. Масалан, бир футбол интернати бор. У ерда футбол майдонининг ҳолатини назорат қилиш учун жавобгар ходим йўқ. Аммо у ерда маош оладиган 50 нафарга яқин мураббий бор. Биз сонга эмас, сифатга эътибор қаратишимиз лозим. Спорт мактаблари ўртасида ўзаро мусобақаларни кўпайтиришимиз лозим. Улар ўртасида рақобатни кучайтирайлик. Ана шунда ривожланиш бўлади. Пойдеворни мустаҳкам қўйиб олмасак, 2024 йилги Олимпия ўйинларида ҳам ишонч билан иштирок эта олмаслигимиз мумкин.Биз татбиқ этишни истаётган тизимга асосан умумтаълим мактаблари ИБЎСМ ва БЎСМларга, улар эса ўз навбатида Олимпия захира коллежларига иқтидорли спортчиларни тайёрлаб беришлари керак.
Умид Аҳмаджонов, МОҚ президенти
Изоҳ (0)