Аввалроқ Ўзбекистон Президенти Шавкат Мирзиёев ва Тожикистон президенти Эмомали Раҳмон Душанбедаги музокараларни кенгайтирилган таркибда давом эттиргани ҳақида хабар берилганди. Музокаралардан сўнг эришилган келишувлар бўйича ҳужжатларни имзолаш маросими бўлди, деб хабар берди Президент матбуот хизмати.
Ўзбекистон Президенти Шавкат Мирзиёев ва Тожикистон Республикаси Президенти Эмомали Раҳмон Дўстлик ва яхши қўшничиликни мустаҳкамлаш тўғрисида қўшма баёнот, Ўзбекистон—Тожикистон давлат чегарасининг алоҳида участкалари тўғрисидаги шартномани имзоладилар.
Савдо, иқтисодиёт, инвестиция, молия, транспорт ва транзит, қишлоқ хўжалиги, сув-энергетика, солиқ, божхона, туризм, фан-таълим, соғлиқни сақлаш, маданият, хавфсизлик ва жиноятчиликка қарши курашиш соҳаларидаги ҳамкорлик ҳамда ҳудудлараро алоқаларни ривожлантиришга қаратилган жами 27 та ҳужжат имзоланди.
Ушбу салмоқли ҳужжатлар тўплами икки мамлакат ва унинг қардош халқлар ўртасидаги ўзаро манфаатли ҳамкорликни ҳар томонлама ривожлантириш учун янгича ҳуқуқий асос яратади.
Матбуот анжуманида Шавкат Мирзиёев ва Эмомали Раҳмон музокаралар дўстона, очиқ ва амалий руҳда ўтганини, мулоқотлар натижасидан мамнунлигини таъкидладилар.
«Биз Ўзбекистон ва Тожикистоннинг сиёсий, савдо-иқтисодий, транспорт-коммуникация, энергетика ва бошқа устувор соҳалардаги муносабатларини мустаҳкамлашга доир долзарб масалаларни муҳокама қилдик. Бунинг натижаси сифатида муҳим ҳужжатлар – Давлат чегараси бўйича шартнома ва Фуқароларнинг ўзаро қатнови тўғрисида битим имзоланди. Бугун эришилган тарихий келишувлар нафақат халқларимиз, балки бутун минтақа учун улкан аҳамиятга эга», — деди Шавкат Мирзиёев.
Хабар қилинганидек, Ўзбекистон ва Тожикистон ўртасидаги товар айирбошлаш ҳажмини аввалига 500 миллион долларга етказиш ҳақида сўз борган эди. Давлат раҳбарларининг самарали музокаралари, ишбилармон доираларнинг бевосита мулоқоти натижасида бу кўрсаткич 1 миллиард долларга олиб чиқиладиган бўлди.
Шавкат Мирзиёев Ўзбекистон ва Тожикистон ўртасида ҳал қилинмаган масалалар қолмаганини таъкидлади. Президент Эмомали Раҳмон бу фикрни тўла қўллаб-қувватлади. Томонлар икки мамлакат ўртасидаги муносабатларни ўзаро ишонч, дўстлик ва яхши қўшнилик асосида янада мустаҳкамлашга интилишини билдирди.
Ташриф доирасида бўлиб ўтган бизнес-форум ва Ўзбекистон миллий саноат кўргазмаси доирасида умумий қиймати 143 миллион доллардан ортиқ савдо шартномалари ва кооперация битимлари, шунингдек, Ўзбекистон банклари томонидан савдони молиялаштиришга 100 миллион доллар маблағ ажратиш тўғрисида битим имзолангани таъкидланди.
Изоҳ (0)