Адлия вазирлигида NSGI делегацияси билан учрашув бўлиб ўтди

Адлия вазири ўринбосари Акбар Тошқулов Британиянинг National School of Government International (NSGI) ташкилотининг эксперт вакиллари Алан Уейтс ҳамда Лейла Броснанни қабул қилди. Бу ҳақда Адлия вазирлиги матбуот хизматига таяниб, UzDaily хабар берди.

Учрашувдан мақсад Ўзбекистонда 2017—2021 йилларга мўлжалланган ҳаракатлар стратегиясини амалга ошириш бўйича Давлат дастури доирасида вазирлик томонидан режалаштирилган лойиҳаларни амалга оширишда Буюк Британиянинг тажрибасини ўрганишдан иборат.

Тошқулов Британия томони билан ҳамкорлик олиб боришнинг учта асосий йўналишини қайд этди, хусусан, Британиянинг Citizens Advice ҳамда Company House каби ахборот-консультация механизмини жорий этиш, шунингдек, вазирлик фаолиятини халқаро экспертларни жалб этиш орқали такомиллаштириш ва шу борада таклифлар билан танишиш.

Ўз навбатида, NSGI вакиллари ташкиллаштирилган ушбу йиғилиш учун миннатдорчилик изҳор этди ва самарали ҳамкорликка умид билдирди.

Британия томони ўз мамлакатининг фуқаролар билан ишлаш соҳасида давлат тажрибаси билан ўртоқлашди ва Ўзбекистондаги шунга ўхшаш лойиҳаларни амалга оширишда тегишли ёрдам кўрсатишга катта қизиқиш билдирди.