АҚШнинг Виржиния штатида яшовчи Брайан Торнхилл безорилик учун жазо сифатида 10 ёшли ўғлини мактабгача ёмғир остида югуриб боришга мажбур қилди. Ҳолат акс этган видеога «РИА Новости» эътибор қаратди.
Эркак видеони Facebook’да эълон қилди. Унда ота оғир сумка билан ёмғир остида югуриб кетаётган ўғлининг изидан машинада бормоқда. Видео тўрт кун ичида 26 миллион мартадан кўпроқ томоша қилинди.
Отанинг ҳикоя қилишича, ўғли мактаб автобусида безорилик қилгани сабабли уч кун давомида ундан фойдаланиши тақиқланган. Ота бунга чидай олмаган, шунинг учун ўғлини мактабгача югуриб боришга мажбур қилган.
Торнхиллнинг сўзларига кўра, мактабгача бўлган масофа 1,6 километрни ташкил қилади. У жисмоний юкламанинг фойдаси ҳақида эслатган ҳолда, бундай жазолаш усулини «ижодий» деб атаган ва болаларни масъулиятга ўргатиш учун уларни жазолашдан аввал «ижодкор бўлиш»га чақирган.
Эркакнинг айтишича, ўғли шу тарзда бир ҳафта югуради. Ўқитувчилар эса бунинг натижасида боланинг ахлоқи яхшиланганини билдирган.
Видеога минглаб изоҳлар билдирилган. Кимдир Торнхиллни ёмонлаган бўлса, бошқа биров унинг хатти-ҳаракатини қўллаб-қувватлаган.
Изоҳ (0)