Ўзбекистонга олиб кириладиган ҳаво шарлари 2020 йилгача божхона божларидан озод этилди. Бу ҳақда Туризмни ривожлантириш давлат қўмитаси раиси ўринбосари Шоҳрух Шораҳметов Халқаро аэронавтика федерацияси вакиллари билан учрашув чоғида айтиб ўтди, деб ёзади Spot. Учрашувда томонлар Ўзбекистонда аэронавтикани илгари суришни муҳокама қилди.
«Президент қарори билан 2020 йилгача мамлакатга олиб кириладиган барча ҳаво шарлари божхона божларидан озод қилинди. Шунингдек, биз тижорат банклари билан ишлаяпмиз, уларнинг ҳаво шарлари сотиб олиш учун имтиёзли кредитлар беришига эришмоқчимиз, бу борада махсус ечим тайёрлаяпмиз», — деди Шоҳрух Шораҳметов.
Йил охиригача Ўзбекистоннинг қадимий шаҳарларида 15 та аэростат ишга туширилади. Турли мамлакатлардан ҳавода сузувчиларни жалб қилган ҳолда томошали фестивалларни ташкил қилиш режалаштирилмоқда.
«Аввало биз бизнес билан ишлашимиз, ҳаво шарлари нафақат хобби, балки даромад ҳам эканлигини кўрсатишимиз керак. Бу қимматбаҳо ҳузур-ҳаловат, аммо биз бизнес ҳамжамиятини сармоя киритишга чақирамиз, чунки бу йўналиш сердаромад ва айниқса хорижда оммалашиб бормоқда. Аэронавтика қўшимча бизнес ҳамда чет эллик сайёҳлар учун янги сайёҳлик маҳсулотига айланиши мумкин», — деди Шораҳметов.
Изоҳ (0)