Жиззах вилоятининг Янгиобод тумани ва Тожикистоннинг Суғд вилояти ўртасидаги «Қўшқанд» ва «Учтўрғон» чегара назорат ўтказув пунктларининг тантанали очилиш маросими бўлиб ўтди. Бу ҳақда ЎзА хабар бермоқда.
Ўзбекистон ва Тожикистоннинг давлат байроқлари билан безатилган ўтказув пунктидаги тантанали тадбирда ҳар иккала томондан вилоят ҳокимликлари, уруш ва меҳнат фахрийлари, жамоатчилик вакиллари, чегара ҳудудидаги маҳаллаларда истиқомат қилаётган аҳоли вакиллари иштирок этди.
Карнай-сурнай садолари остида «Қўшқанд» чегара назорат ўтказув пунктидаги тўсиқ очилиб, қўшни Тожикистон делегацияси Ўзбекистон ҳудудига кириб келди. Меҳмонлар ўзбекона меҳмоннавозлик, нон-туз билан кутиб олинди.
Меҳмон ва мезбонлар тўкин дастурхон атрофида дилдан суҳбатлашди. Саҳнада ўзбек ва тожик куй-қўшиқлари, жозибали рақслар ижро этилди.
Ўзбекистонликлар ҳам Суғд вилоятининг Истравшан шаҳридаги чегара назорат-ўтказиш пунктида карнай-сурнай садолари остида кутиб олинди. Бу ерда ҳам тантанали тадбир бўлиб ўтди. Ўзбек ва тожик санъаткорлари ижросидаги куй-қўшиқлар байрамга ўзгача файз бағишлади. Икки халқ вакиллари биргаликда рақсга тушиб, бир пиёла чой устида дийдорлашди.
Шу куни Янгиобод туманидаги Қўшқанд қишлоғини Тожикистоннинг Зафаробод тумани билан боғлаб турувчи «Учтўрғон» чегара назорат ўтказиш пункти ҳам очилди.
Изоҳ (0)