Ўзбекистон Бош прокуратураси собиқ бош прокурор Рашид Қодировнинг иши бўйича қўлга олинган шахсларга нисбатан тергов ҳаракатлари ҳақида ахборот берди. Ўз навбатида, бу иш бўйича аввалроқ ОАВда тарқатилган баъзи хабарларга раддия берди.
Тошкент вилоятининг собиқ прокурорлари Жамшид Файзиев ва Улуғбек Суннатов ушланган
Бир неча кун аввал интернетда Тошкент вилоятининг собиқ бош прокурорлари — Жамшид Файзиев ва Улуғбек Суннатов ушлангани, улар собиқ бош прокурор Рашид Қодиров иши бўйича тергов қилинаётгани ҳақида хабарлар пайдо бўлганди. Бош прокуратура бу хабарларни тасдиқлади. Идора баёнотида бу ҳақда, жумладан, шундай дейилади:Тергов сирини ошкор этмаган ва жиноят процесси иштирокчиларининг ҳуқуқларини бузмаган ҳолда, Бош прокуратура томонидан қўзғатилган ва тергов ҳаракатлари ўтказилаётган жиноят иши доирасида Рашид Қодиров Жиноят-процессуал кодекси 221-моддаси тартибида ушланганлиги ҳақида хабар берилган эди. Ҳозирги кунда жиноят иши бўйича бош прокурорнинг собиқ ўринбосарлари ҳамда Тошкент вилоятининг собиқ прокурорлари Жамшид Файзиев ва Улуғбек Суннатов ушланган.Бош прокуратуранинг қайд этишича, қонунчилик талабларига мувофиқ тергов органи дастлабки терговни олиб бориш вақтида жиноят ишидаги барча маълумотларни ёки унинг муайян қисмидаги маълумотларни ошкор қилинмайдиган деб эътироф этишга ҳақли.
«Бу каби ахборотларни эълон қилиш тезкор тадбирлар ва дастлабки терговга зиён етказиши, айбдор шахсларни ўз вақтида фош этиш ва ушлашга тўсқинлик қилиши мумкин... Мазкур жиноят иши бўйича тергов сирини ташкил қилмайдиган қўшимча ахборотлар вужудга келиши баробарида Бош прокуратура расмий сайтида тегишли маълумотлар чоп этиб борилиши маълум қилинади», — дейилади Бош прокуратура ахборотида.
Тошкент шаҳар прокурорининг собиқ биринчи ўринбосари Мираълам Мирзаев ҳақидаги хабарлар ҳақидаги хабарлар «ҳақиқатга мувофиқ эмас»
Аввалроқ интернет-нашрларда Тошкент шаҳри прокурорининг собиқ биринчи ўринбосари Мираълам Мирзаев Рашид Қодиров иши бўйича ушлангани ҳақида хабарлар берилган эди. Бош прокуратура эса Мирзаев собиқ бош прокурор иши бўйича ушланмаганини маълум қилди. Идора раддиясида шундай дейилади:Интернет тармоғида Ўзбекистон собиқ бош прокурори Рашид Қодировга нисбатан Бош прокуратура томонидан қўзғатилган жиноят иши бўйича Тошкент шаҳар прокурорининг собиқ биринчи ўринбосари Мираълам Мирзаев ва унинг оила аъзолари ушланганлиги тўғрисида хабар тарқатилган. Бош прокуратура ушбу маълумот ҳақиқатга мувофиқ эмаслигини маълум қилади.