Президент ҳузуридаги Хавфсизлик кенгаши сектор мудири Элёр Ғаниев ва Ўзбекистоннинг Россиядаги элчиси Баҳром Ашрафхонов Москвада Халқаро муносабатлар давлат институти (МГИМО) ректори Анатолий Торкунов билан учрашди. Бу ҳақда университет матбуот хизмати маълум қилди.
Элёр Ғаниев университетнинг Ўзбекистонга кадрлар тайёрлаб беришдаги ўрнига юксак баҳо берди, ҳамкорликни ривожлантириш ва ўзаро алоқаларнинг янги йўналишлари устида ишлашни таклиф этди. Бундай йўналишлардан бири Тошкентда МГИМО филиали очилиши бўлиши мумкинлиги таъкидланди.
Анатолий Торкунов сони йил сайин ортиб бораётган ўзбекистонлик абитуриентлар тайёргарлигининг юқори даражасини эътироф этди. Ўқув юрти жорий йил 20—25 апрель кунлари Тошкент, Самарқанд ва Бухорода бўлиб ўтадиган таълим кўргазмасида навбатдаги бор иштирок этишини қайд этди.
Томонлар Ўзбекистонда МГИМО битирувчилари ассоциацияси фаолияти, бу ерда уларнинг анъанавий форумини ўтказиш имкониятини муҳокама қилди. Қўшма таълим дастурлари яратиш ва ўзаро ҳамкорликнинг бошқа кўринишларига дарҳол киришиш ҳақида келишиб олинди.
Изоҳ (0)