Ўзбекистон Президенти Шавкат Мирзиёев 27 февраль куни экспорт ва импорт масалаларига бағишланган видеоселектор йиғилишида соҳа бўйича мутасадди ташкилотлар, масъуллар фақат қуруқ ҳисобот чекланаётгани, баъзан бу ҳисоботлар очиб ҳам кўрилмаётганини танқид қилди. Йиғилишдан репортаж 27 февраль куни «Ўзбекистон 24» телеканалининг «Ахборот 24» дастурида намойиш этилди.
Мана, икки ой ўтяпти, лекин «эртага иқтисодиёт нима бўларкин?» деган саволга жавоб йўқ.На Вазирлар Маҳкамаси, на Ташқи савдо вазирлиги, на Иқтисодиёт вазирлиги ёки Давлат божхона қўмитаси республикага кириб келаётган маҳсулотларнинг импортини таҳлил қилмагани, қайси маҳсулот қанча миқдорда ва қандай нархларда олиб келинаётганини ўрганиш уёқда турсин, ҳатто бу ҳақда ўйлаб кўрмагани ҳақиқат ва бу менга номаъқул нарса.
Жойларда қайси ҳоким ва соҳага мутассадди раҳбарлар ўз ҳудудига кириб келаётган ёки корхоналар импорт қилаётган маҳсулот билан қизиқяпти? Ҳеч ким. Бу ҳолда эртага иқтисодиётимиз нима бўлади? Нима учун Навоий вилояти ҳокими, НКМК ёки Навоийазот корхонаси четдан кириб келаётган импорт ҳажмини билмайди ёки қизиқмайди?
Умуман, экспорт ва импорт масалалари билан шуғулланишда фақат ой ёки чорак тугаганидан кейин номига ҳисобот бериш билан чекланиб қолинган. Бу ҳисоботларни таҳлил қилиш ёки тегишли чоралар кўриш уёқда турсин, очиб ҳам ўқилмаган, бу соҳада назорат бутунлай ўз ҳолига ташлаб қўйилган, десак бу ҳам тўғри.
Ҳукуматнинг қайси комплекси ёки идораси импорт ва экспорт ҳажмига таъсир этаётган омилларни таҳлил қиляпти? Афсуски, ҳеч ким бу масала билан шуғулланмаяпти.
Шавкат Мирзиёев, Ўзбекистон Президенти
Изоҳ (0)