Наманганлик шифокорларнинг чет эллик мутахассислар билан ҳамкорлиги кенгайиб бормоқда. Унинг доирасида Ҳиндистондаги етакчи клиника — Fortes вакиллари вилоятга келди. Бу ҳақда «Дарё»га вилоят соғлиқни сақлаш бошқармаси матбуот хизмати маълум қилди.
Клиниканинг малакали мутахасислари 3 кун давомида водий аҳолисига беминнат тиббий хизмат кўрсатади. Аниқроғи, кардиожарроҳлик, ортопедия-нейрожарроҳлик ва нефрология-урология йўналишлари бўйича тиббий кўриклар ташкил этилади.
Фаолият бошланиши олдидан ҳиндистонлик меҳмонлар вилоят болалар кўп тармоқли тиббиёт марказига ташриф буюрди. Тиббиёт маркази бош шифокори Абдумалик Раҳмонов шифохонада болаларни соғломлаштириш борасида амалга оширилаётган ишлар хусусида гапириб берди. Шундан сўнг ортопед-нейрожарроҳ Дивеш Гулати шу жойнинг ўзида бемор болалар қабулини бошлади.
Ҳиндистоннинг таниқли шифокорларидан бири Раджу Вияс вилоят кардиология марказида юрак хасталикларидан азият чекаётган беморларни қабул қилмоқда.
— 8 йилдан бери Ҳиндистонга бориб, кардиологлар кўригидан ўтишни орзу қилардим. Бугун Намангандан чиқмай туриб мақсадимга эришганимдан хурсандман. Раджу Вияс хасталигимга оид текширув маълумотномаларини ўрганиб, тегишли тавсияларини берди. Соғлиғимни тиклашга умид ўйғонди, — дейди Жаҳонгир Султонов.
Вилоят кўп тармоқли тиббиёт маркази поликлиникасида ҳам тиббий кўрик ўтказилмоқда. Уни мазкур клиника шифокори, профессор Салил Жаиннинг асиссенти Кумар Аниш ва ўзбекистонлик нефрологлар амалга оширмоқда.
Fortes вакиллари орасида нафақат врачлар, балки инвестиция бўйича менежерлар ҳам бор. Бундан ўзаро манфаатли ҳамкорлик кўлами янада равнақ топиши ҳақида хулоса қилиш мумкин.
Изоҳ (0)