Тошкентда иқтисодий ҳамкорлик бўйича Ўзбекистон—Корея биринчи йиғилиши бўлиб ўтди

13 февраль куни Тошкент шаҳридаги Халқаро бизнес марказда Иқтисодий ҳамкорлик масалалари бўйича Ўзбекистон—Корея биринчи қўшма йиғилиши бўлиб ўтди.

Ўзбекистон делегациясига бош вазир Абдулла Арипов, корейс томонига бош вазир ўринбосари, Стратегия ва молия вазири Ким Донг Ён бошчилик қилди. Жанубий Корея делегацияси таркибидан Стратегия ва молия, Ташқи ишлар, Савдо, саноат ва энергетика вазирликларининг 60 дан зиёд вакили иштирок этди.

Ўзбек-корейс йиғилиши давомида томонлар Иқтисодий ҳамкорлик ва ривожланиш фондидан 2018—2020 йилларда олинадиган қарз ҳисобига Ўзбекистон ва Корея Республикаси ҳукуматлари ўртасидаги ҳадли келишув доирасидаги лойиҳаларни амалга ошириш масалаларини муҳокама қилди. Лойиҳаларга 500 миллион доллар ажратилади.

Томонлар кўп тармоқли болалар тиббиёт марказини ташкил этиш лойиҳасини ҳам кўриб чиқдилар. Бу лойиҳа бўйича ўзаро англашув меморандуми имзоланди. Икки томон Иқтисодий ҳамкорлик масалалари бўйича Ўзбекистон—Корея биринчи қўшма йиғилиши протоколи ҳам имзоланди.

Бундан ташқари, томонлар Тошкентда Кореянинг юксак технологиялар институти билан биргаликда яратиладиган Ўқув-амалий тўқимачилик Технопарки лойиҳасини ўз вақтида ишга тушириш, ўзбек-корейс бизнес марказини яратиш, Ўзбекистонда Корея маданияти ва санъати уйини очишни муҳокама қилди.